At hvørt einasta skriv, sum verður sent miðlunum, fer púra óviðgjørt á heimasíðuna hjá Beiti og Skúvadal er eitt, at hvør einasta sending og regla, sum Kringvarpið framleiðir eisini endar har, er annað. Og at menninir handan heimasíðuna tilvitað ignorera alt, sum Miðlahúsið framleiðir, er eitt triðja.
Feskasta dømið um hetta síðsta fingu vit í gjár, tá Vágaportalurin mátti heilt til Danmarkar at endurgeva eina søgu, sum Miðlahúsið hevði gjørt.
Vágaportalurin kundi uttan at blunka endurgeva donsku fótbóltsheimasíðuna bold.dk, fyri eina søgu, sum bold.dk annars endurgav in.fo fyri.
Sostatt kunnu danskir miðlar endurgeva føroyskar miðlar, meðan ein ávísur føroyskur miðil má endurgeva danskar miðlar, sum endurgeva føroyskar miðlar. Skil tað hvør, ið skilja vil...
– Vit plaga at siga, at summi fara um ánna eftir vatni. Men í hesum føri fara teir báðir Skúvadal og Beiti ikki einans um áir, firðir og sund – men um Atlantshavi, bara fyri ikki at nevna veruligu kelduna.
