Fert tú á ólavsøku?
- Ja, sjálvandi fari eg á ólavsøku. Eri uppvaksin við, at babba fór við okkum til kappróður. Vit systkin vóru altíð í føroyskum klæðum.
Tað sigur Katrin Dagbjartsdóttir í Havn.
Hvussu heldur tú ólavsøku í ár?
- Sum vanligt fari eg at ganga mær ein túr - ella fleiri. Síðan gongur leiðin niðan á Láarveg 50 til mammu og Jan. Tey hava altíð kalt borð. Eftir tað, plagi eg at fara á útimøti, bæði uttan fyri Ebenezer og á Vaglinum hjá Frelsunarherinum.
Katrin Dagbjartsdóttir sigur, at hon fer eisini at vitja vinfólk og hugna mær saman við teimum.
- Fyrr plagdi eg at keypa meg fátæka niðri á Skálatrøð saman við synunum, men nú eru teir so vaksnir.
##med2##
Hon heldur, at tað besta við ólavsøkuni er at ganga í miðbýnum - í herligu Havnini, sum hon tekur til - og práta við glað fólk.
- Ymisku sniðini í føroysku klæðunum gleða meg eisini. Ein serligur og savnandi stemningur er í býnum á ólavsøku.
Hvat kundi verið øðrvísi við ólavsøkuni?
- Minni drekkarí. Tað er syrgiligt at síggja drukkin fólk, serliga tey ungu. Men, eg haldi meg síggja færri av teimum á ólavsøku - ella kanska er tað tí, at eg havi slept mær til hús fyrr um kvøldið, sigur Katrin Dagbjartsdóttir.
