Arsene Wenger var ikki blíður á tíðindafundinum undan Champions League uppgerðini móti Bayern Munchen í kvøld.
Venjarin hjá Arsenal er undir trýsti, eftir at Arsenal um vikuskiftið tapti fyri Blackburn í FA Cup steypakappingini. Tað eru eftir hondini nøkur ár síðani, at Arsenal hevur vunnið nakað steyp, og nú byrja viðhaldsfólkini eisini at ótolnast.
Á tíðindafundinum gjørdist franski venjarin hjá Arsenal í øðini, tá eitt tíðindafólk spurdi um nøkur viðurskifti í samband við sáttmálan hjá Arsene Wenger. Restina av tíðindafundinum brúkti Arsene Wenger, sum hevur verið venjari hjá Arsenal síðani 1996, til at fílast á spurningarnar og kjakast við tíðindafólkini.
Arsenal skal í kvøld spæla móti Bayern Munchen, sum kom í Champions League finaluna í farna kappingarári. Ein annar dystur er eisini í Champions League í kvøld. Hann er millum portugisiska FC Porto og spanska Malaga.
Champions League 1/8 finalur:
Arsenal Bayern Munchen (19:45)
FC Porto Malaga (19:45)
