Úrslitið er eitt vet betur enn undanfarna ár. Sølan fyri samtakið var 511,2 mió.kr í 2020. í mun til 522,4 mió.kr. í 2019. Hóast sølan minkaði frá 2019 til 2020, vegna alheimsfarsóttina, Covid-19, megnaði Vónin samtakið at tillaga raksturin soleiðis, at úrslitið bleiv betur enn undanfarna ár. Við ársenda 2020 var eginognin fyri Vónin samtakið 308,3 mió.kr. í mun til 275,2 mió.kr.
Tað skrivar Vónin í tíðindaskrivi.
Umleið 2/3 av samlaðu søluni hjá samtakinum er til kundar uttan fyri Føroyar. Meira enn ein triðingur av samlaðu søluni er til alivinnuna, har ið Vónin samtakið serliga hevur upplivað ein vøkstur á skotska marknaðinum.
– Felagið í Grønlandi, Qalut Vónin, ið hevur góða staðseting á fýra týðandi havnum, hevur virkað til at Vónin er blivin størsti veitari til botn- og rækjutrolsvinnuna á marknaðinum, skrivar felagið.
##med2##
Eitt nýmótans framleiðsluvirkið í Litava við sínum núverandi 10.000 fermetrum og áleið 250 starvsfólkum tryggjar at karmarnir fyri at Vónin kann veita eina álítandi og kappingarføra vøru av hágóðsku til fiski- og alivinnuna um alt Norður Atlantshavið er til staðar.
Fyri at verða slóðbrótandi á marknaðinum hevur Vónin valt at styrkja grundarlagið innan nýmenning av fiskaútgerð. Vónin hevur keypt donsku menningarfyritøkuna Volu Ventis ApS, ið hevur drúgvar royndir innan aero- og hydrodynamik.
Vónin er eitt av tólv feløgum, ið luttekur í vinnulívsverkætlanini, Burðardygt Vinnulív, sum hevur til endamáls at menna burðardyggar mannagongdir í føroyska vinnulívinum og lúka krøvini hjá ST um burðardygga menning.
Starvsfólkatalið í samtakinum er umleið 450 starvsfólk við ársenda 2020. 100 av teimum starvast í Føroyum, sigur Hjalmar H. Petersen, stjóri
Vónin samtakið fevnir um feløg í Føroyum, Grønlandi, Kanada, Íslandi, Danmark, Norra og Litava. Í Føroyum hevur Vónin tríggjar deildir. Ein deild við Norðskála til alivinnuna, ein deild í Fuglafirði til uppisjóvarvinnuna, og ein deild í Tórshavn til botn- og rækjutrolsvinnuna.
##med3##
Vónin samtakið er veitari til fiski- og alivinnuna. Fiskivinnuútgerð fevnir um pelagisk og semipelagisk trol, botn-og rækjutrol, nótir, skiljiristir, trollemmar, rúsur osfr. Til alivinnuna eru veitingarnar framleiðsla og søla av nótum, akkersskipanir, fuglanet eins og vasking og umvælingar av nótum osfr. Til aðrar vinnur selur Vónin veirar, ketur, tog, net, lyftiútgerð o.a.
