Høgni Klein var annars fegin um, at føroyska liðið hevði reist seg í seinna dystinum móti íslendingum eftir eyðmýkjandi tapið á Eiði leygardagin. Sambært Høgna hevði føroyska manningin sett sær fyri, at dysturin sunnudagin ikki skuldi tapast við meiri enn í mesta lagi tíggju málum.
Sera sterkir íslendingar
Spurdur hvussu tað bar til, at føroyingarnir stóðu seg so mikið væl í seinna dystinum í mun til fyrra dystin, segði Høgni Klein:
- Tað var stórur munur á gejstinum í hesum seinna dystinum í mun til tann fyrra. Vit høvdu eisini sagt við okkum sjálvar, at vit skuldu koma sterkt aftur eftir dystin á Eiði, og lyftið, ið vit høvdu givið um ikki at tapa við fleiri enn tíggju málum, hildu vit eisini, segði Høgni Klein.
Kyndlamaðurin helt tó eisini, at íslendsku mótstøðumenninir vóru sera sterkir, og at tað sást aftur úti á vøllinum, at teirra kapping júst var komin at enda, meðan tann føroyska var liðug fyri tveimum mánaðum síðani.
- Tú sært, hvussu nógv skot, ið vit hava, sum ikki raka málið. Tað er einki at ivast í, at vóru vit í dystarvenjing, so høvdu vit staðið okkum betur, tí tá høvdu skotini sitið betur, segði Høgni Klein. Hann segði eisini, at eftir hansara tykki liggur føroyska kappingin still alt ov leingi, og um vit ætla okkum at koma víðari, so er neyðugt, at tað verður bæði vant og spælt longri, tí sum nú er, liggur hondbólturin í Føroyum stillur alt ov leingi.
