Tað eydnaðist ikki Dia Midjord og hansara monnum í VÍF at vinna steypafinaluna leygardagin, og tað harmaði venjaran almikið.
Vit spurdu Dia, hví VÍF ongantíð av álvara fekk spælið hjá sær at koyra.
- Eg veit ikki heilt. Vit missa Inga, men vit eiga at kunna spæla okkara spæl uttan hann. Vit standa ikki nóg væl í verjuni, og teir koma til alt ov nógv bílig mál, sum teir ikki skulu fáa, sigur Dia Midjord.
Ofta verður sagt, at málverjarnir hava stóran týdning í einum dysti, og hetta helt Dia eisini var galdandi í finaluni leygardagin.
- Marian stendur ein fantastiskan dyst í málinum hjá teimum, og hann hevur fleiri bjargingar, tá ið vit annars eru um at fáa fatur á teimum aftur. Samstundis haldi eg ikki, at okkara málverjar standa meiri enn ein miðal dyst, og tað kann verða munurin millum tvey lið, sigur Dia Midjord.
