Borgarstjórin í Sjóvar Kommunu torir ikki at spáa um, um fleiri vinnur ella fleiri borgarar flyta til kommununa. "Vit taka tað róliga og halda tunguna mitt í munninum. Vit fara ikki í gongd við at fyrireika nakað - tað er politikkur, so man veit aldrin. Men vit hava barnagarðar og skúlar og næsta ár stendur eisini eldrasambýlið klárt - so hava vit alla viftuna til teir borgarar, sum ynskja at flyta til kommununa", sigur hann.
Kann ganga útyvir handilslívið
Eitt negativt árin av tunlinum kann verða, at tað verður tungt hjá handilslívinum.
Tað verður lætt at koyra til Havnar at keypa klæðir og annað, og tað kann vera hart fyri handilslívið.
"Bankarnir steingja avgreiðslurnar og Bónus og aðrar handilsketur lata upp, so tað kann vera at teir smáu handlarnir doyggja, sigur borgarstjórin. Hann fegnast tó um, at tunnilin kemur - serliga við atliti til at vinnulívið kann spara pengar og tíð uppá flyting av fiski.
"Vinnan fer at spara nógvar pengar - tað verða flutt 2500 tons av fiski um árið eftir landsvegnum, bara frá Bakkafrost", sigur hann.
Gróti brúkast til at gera veg til Selatrað
Borgarstjórin fer at heita á Landsverk um at brúka grótið frá tunlinum til at gera veg til Selatraðar. "Øll kunnu ikki gera havnaløg, og vit vilja gjarna gera nakað annað. Skótarnir brúka nógv Selatrað. tey hava td. gjørt eitt upplivilsismiðstøð í gomlu smoltstøðini hjá Bakkafrost, sigur Artur Johansen.
