Fyri nøkrum mánaðum síðani varð eitt nýtt felag stovnað við navninum VITA. Ætlanin var at hetta felagið skuldi taka kappingina upp við Føroya Tele og í fyrsta umfari skuldi dentur leggjast á internetið. Síðani hevur ikki so nógv verið at hoyrt frá felagnum.
Men tað er har kortini. Nú við einum nýggjum navni tí Vita-navnið kom tvørt fyri hjá onkrum øðrum og tí skifti felagið navn til Alnót Telecom.
Málsetningurin hevur vist eisini fingið eitt kvink uppeftir, tí ístaðin fyri at leggja dent á internetið hevur felagið valt at leggja dent á, frá fyrsta degi, at vera ein seriøsur kappingarneyti hjá Føroya Tele, sum annars hevur sitið einsamalt á øllum telemarknaðinum.
Kappast á øllum økjum
Sum skilst á verkætlanarleiðaranum, Jónsveini Joensen, so meitr hann tað vera góðar møguleikar fyri at taka kappingina upp við Føroya Tele. Eftir hansara tykki er tænastan haðani ikki betri enn næstbest.
- Tað liggja nógvir møguleikar uttanfyri tað, sum Føroya Tele bjóðar og tað er tann vegin Alnótin ætlar sær at fara. Vit ætla okkum at taka um endan har hinir hava slept, og tað fer at gagna kundunum meiri enn á ein hátt, sigur Jónsvein.
Hann vísir á, at tá ein veitari fær kapping, so er hann noyddur til at fylgja við og tað fær kundin gagn av. Samstundis plagar kapping at síggjast aftur á prísunum og tí fær kundin eisini gagn av.
- Og tað er endamálið við kappingini, sigur Jónsvein.
Jónsvein vísir á, at føroyingar eru langt aftan fyri í menningini av eitt nú internetsambandinum og telekervinum og tað er nakað, sum Alnótin ætlar sær at gera nakað við.
Føroyskt felag
Tá eitt felag skal í holt við eina so stóra verkætlan, er sjálvsagt, at tað krevst nógvur peningur til endamálið. Soleiðis er eisini við Alnótini. Men hvussu hava teir fingið peningin til vega.
- Tá vit byrjaðu bjóðaðu vit førosykum íleggjarum at seta pening í felagið, men tað gekk heldur striltið. Fólk eru eitt sindur varin, men vit hava fingið eitt sera skilagott samstarv við Framtaksgrunnin, sum hevur víst ein framúrskarandi vilja til at fáa hesa verkætlanina upp at koyra, greiðir Jónsvein frá.
Grunnurin hevur annars ikki altíð fingið so góð skotsmál í sambandi við nýggjar verkætlanir, men tað er ikki nakað, sum tit kunnu taka undir við?
- So avgjørt ikki. Men tíverri var tað ikki nóg mikið við tí Framtaksgrunnurin setti í, og tí hava vit so avgjørt, at fara út um landoddarnar at útvega okkum tann írestandi kapitalin.
Mer er tá ikki vandi fyri, at tað verða útlendingarnir, sum fáa avgerandi orðið at siga?
- Nei, tað verður ikki talan um í hesum førinum. Hóast talan er um útlendskan kapital, so verður avgerðarrætturin á føroyskum hondum, sigur Jónsvein, sum kortini ikki vil siga hvørjir útlendsku íleggjararnir eru.
Hetta verður almannakunngjørtum ikki so langa tíð og tá verður eisini almannakunngjørt, hvørjar útlendskar samstarvsfelagar Alnótin Telecom fer at fáa sær.
Samráðast upp á lívið
Tað, sum mesta tíðin í løtuni fer við er, at fáa tær ymsu samstarvsavtalurnar upp á pláss. Alnótin skal keypa seg inn á netið hjá Føroya Tele og tað er ikki bara sum at siga tað at finna fram til ein prís. Eydnast tað ikki, so verður skorið ígjøgnum av landsstýrinum hóast tað í veruleikanum er Fjarskiftiseftirlitið, sum ger tað arbeiði. Og Jónsvein heldur, at Fjarskiftiseftirlitið hevur víst ein sera positivan anda.
- Tað hevur verið sera positivt at arbeiða saman við teimum, sigur hann.
Hvussu samráðingarnar fara at ganga er sjálvandi ikki gott at vita, men hóast tað, so væntar Jónsvein, at lív kemur í Alnótin Telecom áðrenn summarið kemur. Og tað fer at hava við sær nýggj arbeiðspláss.
- Eg rokni við at vit byrja við eini seks-átta starvsfólkum, men við vaksandi virksemi fer tað vónandi at økjast, sigur hann.
Tað merkir sostatt, at føroyskir telekundar fara at fáa møguleikar at velja hvønn veitara teir vilja brúka, og tað verður ikki bara til internettænastu, men eisini til annan flutning. Tað verði seg vanliga telefoni, fartelefoni, .....
