Vanligi vinstri bakkurin á føroyska fótbóltslandsliðnum, Viljormur Davidsen, luttekur ikki í dystinum ímóti Liktenstein í dag. Orsøkin er, at bakkurin er skaddur í baklærinum, og hevur hetta verið gjøgnumgangandi fyri kappingarárið hjá Viljormi, har hann bert hevur spælt sjey dystir fyri Vejle.
- Eg veit ikki, nær eg verði klárur aftur. Sum heild hevur tað ikki verið mítt kappingarár. Eg havi verið rættiliga óheppin, sigur Viljormur Davidsen í viðmerking við heimasíðuna hjá Vejle Amts Folkeblad.
Víðari greiðir bakkurin frá, at skaðin merkist, tá ið hann skal seta ferð á.
- Eg megni at renna og súkkla, men eg fái trupulleikar, tá ið eg royni at spurta. Tað er jú tað, sum er avgerandi, sigur Viljormur við lokalu avísina í Vejle.
Viljormur Davidsen hevur spælt 13 landsdystir fyri Føroyar, men nær tann 14. verður spældur er óvist.
