Tíðindamiðilin hjá ukrainsku verjuni - Sprotyv - vísir aftur einari útsøgn hjá leiðaranum fyri Wagner-herdeildunum, sum berjast saman við russiska herinum í Ukraina.
Leiðarin, sum kallast Jevgenij Prigozjin, sigur í dag, at býurin Bakhmut nærum er kringsettur av russiskum herdeildum.
- Bakhmut er so gott sum kringsettur, og tað er nú bara ein vegur út úr býnum, sigur Wagner-herleiðarin sambært Reuters.
Jevgenij Prigozjin hevur eisini lagt út eitt video-brot, sum skal vísa Wagner-leiðaran nærindis Bakhmut, har harðir bardagar hava verið í fleiri mánaðir.
Tíðindamiðilin hjá ukrainsku verjuni sigur, at býurin, sum sæst í bakgrundini, ikki er Bakhmut, men Paraskovijvka, sum russiskar herdeildir tóku longu hin 20. februar í ár.
Hvørki tíðindini hjá Jevgenij Prigozjin ella tíðindini hjá ukrainska miðlinum eru váttað av óheftum keldum.
Í Bakhmut har eysturi í Ukraina búðu stívliga 70.000 fólk fyri russisku innrásina fyri einum ári síðan, men eftir hørðu bardagarnar eru fá sivilfólk eftir í býnum.
