Tórshavnar havn skal verða ein miðdepil – ein rúgva av mennandi lívi, skip sum koma og fara, og pláss skal vera til øll at virka og vaksa. Tí er eingin ivi um, at tað bæði er skilagott og neyðugt fyri vinnulívið at byggja Tórshavnar Havn út.
Ein virkin vinnan er fortreyt fyri trivnaði og menning í einum samfelag, og vit sum fólk eru neyðug fyri vinnulívið. Í grundini er tað so einfalt. Men tað verður trupult, tá vit eru ósamd um, hvussu karmarnar fyri vinnulívið skulu vera.
Ein góð og vælvirkandi handilsvinna er eisini neyðug, um vit skulu trívast. Eitt av mínum hjartamálum er at tryggja handilsvinnuni bestu karmarnar at virka undir. Tað gera vit best við at lurta eftir, hvat tey sum virka í vinnulívinum hava brúk fyri.
Við at lurta, og við at samstarva um at skapa bestu karmar fyri vinnulívið, kunnu vit gera okkara besta fyri at tryggja inntøkur í kommunukassan, sum er alneyðugt til at fíggja betri tænastur til okkara eldru, at lætta um hjá barnafamiljum og støkum uppihaldarum, og til okkara skúlar og dagstovnar.
Hugsa teg um, tá tú setur krossin 8. november.
Theresa Turiðardóttir Kreutzmann
Valevni fyri Javnaðarflokkin
