Ráðið fyri brekað hevur heitt á ferðavinnuna um at geva teimum ið bera brek ans. Hetta fevnir sjálvandi um heimbúgvar okkara eins væl og um tey fremmandu, ið vitja landið.
Tað er umráðandi, at øll sum ferðast í Føroyum, kenna seg væl, og hava møguleika at koma til tey tiltøk og støð, sum tænastuveitarar og fyriskiparar standa fyri. Ráðið fyri brekað skrivar, at tað er serliga grein 9 í breksáttmálanum, sum er um atkomu og grein 30, sum snýr seg um at vera uppií mentanarlívi, ítrivi, frítíðarlívi og ítrótti, sum eru viðkomandi fyri ferðavinnuna.
Ráðið fyri brekað ynskir, at Visitfaroeisland og kunningarstovur um landið lata víðari breksáttmálan til sínar samstarvspartar, sum upplýsandi tilfar.
Føroya løgting setti breksáttmálan í gildi í 2009. Til tess at hann skal virka, mugu øll - tað almenna og tað privata - gera sítt til, at samfelagið veruliga verður fyri øll.
