- Hetta er ótrúligt, siga teir báðir Jógvan Hansen og Bogi Godtfred, sum hava fingið gullviðurkenning í Íslandi fyri tvífløguna Vinalög. - Vit eru ovurfegnir, at Vinalög hava fingið so góða móttøku bæði í Føroyum og Íslandi, sigur Jógvan Hansen. Hann er heima í jólafrí og verður í kvøld millum teirra, sum skal spæla á Planet Awards 2009. Tað verða Jógvan og Pætur við Keldu, sum fara at spæla saman.
Gull fáa tær fløgur í Íslandi, sum selja meira enn 5.000 eintøk, og tað hava Vinalög gjørt so ruddiliga. Higartil hevur íslendska útgávufelagið Sena bílagt 11.000 eintøk frá framleiðaranum, so tað fer at nærkast, at tvífløgan eisini fer at fáa hægstu viðurkenningina, ið er platin.
- Tá havt verður í huga, at kreppan í Íslandi hevur fingið søluna av fløgum niður í eina helvt, so er tað bara heilt ótrúligt, so væl fólk hava tikið ímóti Vinalögum, sigur Jógvan Hansen.
- Jógvan og eg hava í hvussu er fingið eina jólagávu, sum eingin annar føroyingur hevur fingið, sigur Bogi. Og tað er, sum eg sigi á fløguhúsanum, at tað, ið gav mær íblástur at umseta var, at eg vildi hoyra Jógvan syngja hesar vøkru íslendsku sangirnar á føroyskum. Eg visti, at hann fór at gera tað betur enn nakar annar, og gullheiðurin fyri Vinalög er besta prógvið um tað, sigur Bogi Godtfred.
