Náttúrugripasavnið skipar sunnudagin fyri villblómudegi, sum verður kring alt landið við serkønum frágreiðingum Aftur í ár skipar Náttúrugripasavnið fyri villblómudegi. Sætta árið á rað verður tiltakið ?Villblómudagur í Norðri? skipað sum eitt felags norðurlendskt tiltak. Hendan dag hava fólk í flestum Norðurlondum møguleika at fara út í náttúruna at hyggja at villum blómum við einum kønum túrleiðara.
Endamálið við degnum er at kunna um staðbundnu føroysku floruna og at skipa fyri uttandura virksemi, ið setur fokus á villblómur og at geva plantuáhugaðum ókeypis náttúruupplivingar.
Stigtakari til ókeypis villblómutúrar fyri almenninginum var danska plantufrøðifelagið, ið fór undir hetta tiltak á fyrsta sinni fyri 20 árum síðan. Svøríki, Noregi og Grønland komu við í 2002, og árið eftir vóru Føroyar, Finnland og Ísland eisini við.
Í Føroyum verður skipað fyri 10 túrum, har kønir túrleiðarar bjóða plantufrøðiligar upplivingar og siga frá nógvum áhugaverdum um villblómur.
Øll kunnu luttaka. Túrurin gevur góðar møguleikar at fáa meira at vita um villan plantuvøkstur í Føroyum, og eingin forkunnleiki til plantur krevst.
Ein túrur út í náttúruna verður meiri áhugaverdur, jú meira ein veit um tað, ið ein sær. Veitst tú, hvussu planturnar eita, eitt sindur um teirra vakstrarøki, útbreiðslu, tíðleika og lívfrøði, jú meira fært tú burtur úr einum túri í náttúruni. Alt hetta fært tú meira at vita um á villblómudegnum.
Allir túrarnir verða í náttúruni, har tær villu planturnar vaksa. So minst til at lata tykkum væl í. Og um tit eiga eina floru, er skilagott at taka hana við.
Tað hevur eydnast okkum at fáa fatur á fólki, ið kunnu vera túrleiðarar á einum túri í Sandoynni, einum í Vágum, einum í Eysturoynni og einum í Norðuroyggjum, fýra í Streymoynni og einum í Suðuroynni. Sjey av túrunum byrja kl. 10.00 og tríggir byrja kl. 14.00. Túrarnir vara einar 2 tímar, sí skránna niðanfyri.
SKRÀ FYRI VILLBLÓMUDAGIN 2007
1. Trongisvági
Tíð: 10.00-12.00
Leiðari: Niels Jacobsen
Túrurin byrjar: Við skúlan í Trongisvági.
2. Sands bygd
Tíð: 10.00-12.00
Leiðari: Gunnar Bjarnasson
Túrurin byrjar: Við barnaskúlan heima á Sandi.
3. Tórshavn
Tíð: 10.00-12.00
Leiðari: Anna Maria Fosaa
Túrurin byrjar: Við tyrlupallin úti við Strond.
4. Tórshavn
Tíð: 10.00-12.00
Leiðari: Magnus Gaard
Túrurin byrjar: Við møblasølubúðina Eikina við Sandá.
5. Hoyvík
Tíð: 10.00-12.00
Leiðari: Annleyg Patursson
Túrurin byrjar : Við Keypsamtøkuna í Hoyvík.
6. Velbastað
Tíð: 10.00-12.00
Leiðari: Dánjal Jespersen
Túrurin byrjar: Við barnagarðin á Velbastað.
7. Sandavági
Tíð: 14.00-16.00
Leiðari: Sigga Rasmussen
Túrurin byrjar: Úti á Trøð.
8. Vestmanna
Tíð: 14.00-16.00
Leiðari: Maria Wilhelm
Túrurin byrjar: Á Fitjasandi.
9. Toftavatn
Tíð: 14.00-16.00
Leiðari: Dánjal Petur Højgaard
Túrurin byrjar: Við norðara enda á vegnum við Toftavatn.
10. Klaksvík
Tíð: 10.00-12.00
Leiðari: Kári Purkhús
Túrurin byrjar: Norðri á Strond.
Skráin liggur eisini á heimasíðuni hjá Føroya Náttúrugripasavni www.ngs.fo
Fleiri upplýsingar um villblómudagin kunnu fáast við at venda sær til Føroya Náttúrugripasavn á tlf. 352300, Annu Mariu Fosaa.
