Viljormur í Heiðunum Davidsen var liðskipari, tá lið hansara, Vejle á heimavølli á leikvøllinum í Nørreskoven vann stórsigur 4-1 á Roskilde FC, sum liggur triðovast í næstbestu donsku fótbóltsdeildini. Sigurin merkir, at Vejle nú hevur luft niður til niðurflytingarstrikuna, og hava teir í Vejle nú átta stig niður til Næstved, sum liggur næstaftast á stigatalvuni við 23 stigum.
Øll málini komu í seinna hálvleiki. Í 56. minutti legði Jacob Schoop Vejle á odda, og eitt stórt korter seinni høvdu Agon Mucilli og Gael Ondoua økt til 3-0 áðrenn Roskilde FC svaraði aftur. Heilt ímóti dystarenda staðfesti Artem Favorov sigurin fyri Vejle. Sambært Vejle Folkeblad var talan um besta avrikið hjá Vejle í hesum árinum.
Talan var um ein útsettan dyst, og hava øll liðini í næstbestu donsku fótbóltsdeildini nú leikt 24 dystir hvør. Samanlagt skulu 33 umfør avgreiðast í deildini. Komandi sunnudag tekur Vejle ímóti HB Køge á leikvøllinum í Nørreskoven í Vejle.
Støðan:
| 1 | Hobro | 24 | 13 | 5 | 6 | 44 - 25 | 44 | |
| 2 | Skive | 24 | 13 | 2 | 9 | 32 - 37 | 41 | |
| 3 | FC Roskilde | 24 | 11 | 6 | 7 | 35 - 33 | 39 | |
| 4 | Vendsyssel FF | 24 | 11 | 5 | 8 | 37 - 33 | 38 | |
| 5 | FC Helsingør | 24 | 9 | 10 | 5 | 33 - 25 | 37 | |
| 6 | HB Køge | 24 | 7 | 13 | 4 | 22 - 16 | 34 | |
| 7 | Fremad Amager | 24 | 8 | 9 | 7 | 33 - 29 | 33 | |
| 8 | Vejle | 24 | 8 | 7 | 9 | 36 - 31 | 31 | |
| 9 | Nykøbing FC | 24 | 9 | 4 | 11 | 31 - 35 | 31 | |
| 10 | Fredericia | 24 | 7 | 7 | 10 | 22 - 32 | 28 | |
| 11 | Næstved | 24 | 6 | 5 | 13 | 34 - 41 | 23 | |
| 12 | AB Gladsaxe | 24 | 4 | 3 | 17 | 25 - 47 | 15 |
