Upptakt
Talið av havnarfólki, sum ætlaði sær til Gøtu á seinasta leikdegi mundi falla nakað nógv, tá Tór-Ingar Akselsen í 81. minuttir skeyt HB á gullkós seinasta vikuskifti. Eitt mál, sum í veruleikanum merkti, at gullmøguleikin hjá árstalsfelagnum hvarv
Nú stendur eftir, at talan í Gøtu verður um næstan týdningarleysan dyst, tó at B36 við einum sigri møguliga kann spæla seg til silvurið heldur bronsuna, men tað gera teir so ikki einsamallir av.
Hjá GÍ er tað bert ærann, sum er upp á spæl. Var B36 fremst undan hesum, so kundi GÍ tryggjað sær Europa-Cup pláss við at tapa (!), men tann møguleikin er so ikki til staðar longur.
Nú ræður einamest um at tryggja sær, at liðið ikki fær vánaligastu endastøðuna, síðani teir í 1980 fyri fyrstu ferð leiktu í bestu mansdeildini.
Vánaligasta avrikið er higartil sjeynda plássið í 1989, og hvussu víkir og vendur, so verður talan aftur hesaferð um eitt sjeynda pláss. Ta ferðina ? í 1989 ? hevði GÍ 16 stig, men umroknað til trý-stiga skalan hevði talan verið um 23 stig og ein negativan málmun á fimm stig. Í ár kann GÍ við einum sigri røkka 23 stigum, og málmunurin verður tá ikki verri enn minus trý, og einki er at ivast í, at dagsins GÍ ikki vil verða tað ringasta í felagssøguni.
Einasta fráveran hjá GÍ til dystin tykist vera leikandi venjarin, Krzystof Popczynski. Hann byrjaði inni á Svangaskarði seinast, men mátti skaddur fara av vøllinum, so enn tykist hansara kappingarár ikki at hava fingið nakra positiva vend.
Í B36 ásanna tey sjálvandi, at møguleiki er fyri silvurinum, og tað er so sjálvandi tað, sum farið verður eftir. Nøkur katastrofa er tað tó ikki, um liðið ikki nær hesum málinum, tí hvussu víkir og vendir, so merkir steypasigurin, at tað verða B68 og B36, sum fáa tey bæði UEFA-plássini.
Og hóast slagið um Havnina og gullið tók fast hjá felagnum, so merkist hetta ikki í fráveruni. Eingir skaðar og eingi leikbann gera um seg, so á pappírinum skuldu møguleikarnir fyri einum sigri í øllum førum verið góðir.
