Víkingur gjørdi eitt veruligt bragd í summar, tá liðið úr Eysturkommunu megnaði ein rimmar javnleik 0-0 ímóti norska stórliðnum, Rosenborg, sum fyri stuttum hevur vunnið norska meistaraheitið, og eisini hevur vunnið seg í Europa League bólkaspælið.
Og nú Rosenborg hevur spælt allar heimadystirnar í tippiliguni hetta kappingarárið stendur úrslitið hjá Víkingi á útivølli á Lerkendal leikvøllinum í Tróndheimi enn sterkari.
Víkingur gjørdi nevnliga tað, sum bert fýra av teimum 15 tippiliga liðunum megnaðu, nevnliga ein javnleik ímóti Rosenborg á Lerkendal leikvøllinum.
Bert Strømsgodset, Tromsø (sum Víkingur vann á í Europa League í fjør), Molde og Bodø/Glimt megnaðu tað sama, sum Víkingur, nevnliga ein javnleik á Lerkendal leikvøllinum. 11 av teimum 15 tippiliga liðunum taptu ímóti Rosenborg á Lerkendal leikvøllinum í Tróndheimi.
Einki av teimum 15 tippiliga liðunum megnaði at vinna á Rosenborg á Lerkendal leikvøllinum hetta kappingarárið. Sterki heimavøllurin við 11 sigrum og fýra javnleikum hevur gjørt sítt til, at Rosenborg tryggjaði sær norska meistaraheitið í góðari tíð hetta kappingarárið. Sunnudagin leikar Rosenborg sín seinasta dyst í tippiliguni hetta kappingarárið, tá teir spæla ímóti Aalesund á útivølli.
