Føroyingauppgerð var á Kaplakrika leikvøllinum á Hafnarfjørðinum leygardagin tá FH og Grindavík møttust í dysti í bestu íslendsku fótbóltsdeildini.
Gunnar Nielsen vardi málið hjá FH, og Brandur H. Olsen var á miðvøllinum hjá FH. René Shaki Joensen spældi í álopinum hjá Grindavík.
FH vann 2-1 og var á odda 1-0 í steðginum við einum brotssparki sum Steven Lennon setti í netið. Í 57. minutti økti Brandur H. Olsen til 2-0 aftaná eina góða sending frá Atla Guðnasyni. Brandur var skiftur út løtu seinni. Morgunblaðið skrivar, at talan er um fimta málið hjá Brandi í bestu fótbóltsdeildini í Íslandi hetta kappingarárið.
Sambært Morgunblaðnum fekk René Shaki Joensen gula kortið tá ein tími var farin, og Gunnar Nielsen hevði onkra bjarging í FH-málinum tá boð vóru eftir honum.
HERber til at síggja hæddarpunktini frá dystinum millum FH og Grindavík.
Kaj Leo í Bartalsstovu var við á liðnum hjá ÍBV sum leygardagin tók ímóti Breiðabliki. Dysturin endaði við javnleiki 0-0.
Hósdagin spælir FH á útivølli ímóti Lahti í Finnlandi. Talan er um dyst í undankappingini til Europa League. Sama dag tekur ÍBV ímóti Sarpsborg 08 úr Noregi á Hásteinsvøllinum úti á Heimaey.
Støðan í Pepsideildini:
| Pepsideildin: | |||||||
| 1 | Stjarnan | 12 | 7 | 4 | 1 | 29:16 | 25 |
| 2 | Valur | 12 | 7 | 4 | 1 | 20:11 | 25 |
| 3 | Breiðablik | 11 | 5 | 4 | 2 | 14:6 | 19 |
| 4 | FH | 12 | 5 | 4 | 3 | 21:17 | 19 |
| 5 | Grindavík | 11 | 5 | 2 | 4 | 11:12 | 17 |
| 6 | KR | 11 | 3 | 5 | 3 | 16:13 | 14 |
| 7 | KA | 11 | 3 | 3 | 5 | 14:15 | 12 |
| 8 | ÍBV | 12 | 3 | 3 | 6 | 13:15 | 12 |
| 9 | Víkingur R. | 10 | 3 | 3 | 4 | 9:14 | 12 |
| 10 | Fjölnir | 11 | 3 | 3 | 5 | 13:21 | 12 |
| 11 | Fylkir | 10 | 3 | 2 | 5 | 11:15 | 11 |
| 12 | Keflavík | 11 | 0 | 3 | 8 | 6:22 | 3 |
