Hvussu hevur árið 2014 verið?
- Persónliga hevur 2014 verið eitt rættiliga støðugt ár við sorg og gleði hvørt um annað. Størsta gleðin er at standa á síðulinjuni, meðan tey hálvvaksnu børnini lofta lívsins avbjóðingum. Men, árið hevur eisini verið merkt av álvarsligari sjúku og missi í familjuni.
Tað sigur Rigmor Dam, løgtingskvinna.
Hon heldur, at politiskt hevur árið verið merkt av skilaleysum gølum, rumbli og misáliti.
- Sum land vórðu vit gávað við alstórum ríkidømi, sum tó átti at tænt fjøldini og búskapinum betri. Á altjóða pallinum er heimurin á einum búskaparligum, hernaðarligum og geopolitiskum vegamóti. Støðan í Ukraina, Sýria, ISIS, ebola, veðurlagsbroytingar og høgraekstremisma eyðkendu árið. Samstundis kunnu vit fegnast um, at miðalklassin og miðallivialdurin er vaksandi í Suðuramerkia, Asia og Afrika.
Hvat minnist tú best frá 2014?
- Privat var hetta árið, har tann yngsta varð fermd, og miðlingurin fór niður á eftirskúla. Politiskt minnist eg best málið um javnrættindi fyri samkynd, sum varð felt í vár. Málið var bæði eitt stórt framstig og ein sorgarsøga.
Hvat var tín størsta persónliga uppliving í 2014?
- Lívið er løtur, og nógvar løtur vóru góðar í 2014. Tær takki eg fyri hvønn dag.
Hvat vilt tú helst gloyma frá 2014?
- Eg ynski at gloyma gíslatøkuna av fólkaræðinum, tá tinglimir lótu seg niðurbinda í samband við atkvøðugreiðsluna um borgarliga vígslu fyri samkynd.
Hvat ynskir tú tær í 2015?
- At Javnaðarflokkurin fær eitt gott val og kemur í samgongu, so álit og vælferð fyri øll, javnrættur og samhaldsfesti aftur koma í hásæti. Eisini ynski eg øllum føroyingum - á sjógvi og landi - eitt vælsignað nýggjár, umframt vón, linna og ugga til tey, sum dragast við sorg, sakn og ótta, sigur løgtingskvinnan, Rigmor Dam.
