Fimm minuttir av larmandi tøgn frá donskum veteranum og hermonnum er fyri at vísa ónøgd og vónloysi yvir útsagnir frá Donald Trump um NATO-hermenn.
Hetta hendir leygardagin 31. januar, tá felagsskapurin Danmarks Veteraner hevur boðið til "tøgn mótmælisgongu" frá Kastellet í Keypmannahavn til amerikansku sendistovuna.
Her fara tey møttu at halda tøgn í fimm minuttir. Tað sigur Carsten Rasmussen, sum er landsformaður í Danmarks Veteraner.
– Tað er neyðugt, tí orðini hjá forsetanum um átøkini hjá Danmark og øðrum sameindum londum eru heilt einfalt lygnir, ósømilig og ein háðan, sigur hann.
Amerikanski forsetin, Donald Trump, segði í samrøðu við Fox News hósdagin, at NATO-hermenninir í Afghanistan "hildu seg eitt sindur aftur, eitt sindur burtur frá hermótinum".
Hetta hevur elvt til reaktiónir frá fleiri síðum - umframt danska veteranfelagið hevur bretski forsætisráðharrin, Keir Starmer, eisini kallað útsøgnirnar háðandi og ræðuligar.
Carsten Rasmussen var sjálvur útsendur til Afganistan í 2007 og 2008 á flogstøðini í Kandahar.
– Tá eg hevði verið í Afghanistan í umleið 20 dagar, vóru yvir 30 ung fólk, sum vóru send heim í kistum, sum vóru prýddar við bretskum, hollendskum, kanadiskum og donskum fløggum - og sjálvandi eisini amerikanskum, sigur hann.
Eftir teir 20 dagarnar steðgaði Carsten Rasmussen við at telja kisturnar, sigur hann. Útsøgnirnar hjá Trump eru serliga háðandi fyri avvarðandi, vísir hann á.
– Tað er fyrst og fremst ein háðan av teimum familjum, sum eru eftir í dag, eftir at tær hava mist ein av sínum kæru í Irak ella Afghanistan - í einum av krígnum, sum USA stríddist og sum vit vóru biðin um at hjálpa til við.
Fyri at so nógv sum gjørligt kunnu luttaka í mótmælisgonguni í dag, verður ókeypis bussflutningur í 24 býum út um alt Danmark.
– Tað er torført at vita, hvørja ávirkan mótmælisgongan kann hava - um nakra - men vit vóna, at okkara boðskapur fer at røkka amerikanarum, sigur Carsten Rasmussen.
– Helst ikki til Donald Trump, men til amerikanskar veteranar vit hava stríðst saman við, og kanska eisini til amerikanskar avgerðartakarar.
Mótmælisgongan eitur "No Words", sum merkir "Eingi orð", tí veteranarnir halda, at tað best vísir kensluna, teir sita eftir við.
Sambært danska hervaldinum doyðu 44 danskir hermenn undir átakinum í Afghanistan.
/Ritzau/
