Tað boðar danska Forsætismálaráðið frá í kvøld.
Tá stjórnin er løgd fram fyri kongi, fer komandi forsætisráðfrúan, Mette Frederiksen, út í túnið framman fyri Amalienborg saman við sínum nýggju ráðharrum.
Frá klokkan 13 fara ráðharrahandanir fram í teimum ráðunum, sum fáa nýggjar ráðharrar og ráðfrúur. Har takka fráfarandi ráðharrar fyri seg, meðan nýggju ráðharrarnir verða bodnir vælkomnir. Vanliga verða eisini gávur latnar í hesum sambandi.
Áðrenn tað skulu fráfarandi ráðharrarnir til Amalienborg klokkan 11.45 fyri at siga farvæl við kongin.
Forsætismálaráðið upplýsir, at fleiri upplýsingar um stjórnarskipanina og skránna fyri dagin verða kunngjørdar í morgin.
Mette Frederiksen boðaði í gjárkvøldið konginum frá, at hon hevði fingið undirtøku fyri at skipa eina nýggja minnilutastjórn við teimum fýra flokkunum. Eftir samráðingar á Marienborg fór hon beinleiðis til Odense, har kongshjúnini vóru á summartúri við kongaskipinum Dannebrog.
Í dag varð nýggja samgonguskjalið lagt fram á tíðindafundi á Marienborg. Samstundis kom fram, at Enhedslisten og Alternativet verða parlamentariskt grundarlag undir nýggju stjórnini.
Tá stjórnin verður formliga útnevnd í morgin, byrjar Mette Frederiksen sína triðju setu sum forsætisráðfrú. Hon hevur verið forsætisráðfrú síðan 2019.
Í samgonguskjalinum verður nýggja stjórnin nevnd „Fýrkleyvarstjórnin“. Heitið er kent frá teimum borgarligu stjórnunum hjá fyrrverandi forsætisráðharranum Poul Schlüter, sum stjórnaði Danmark frá 1982 til 1993.
