Tað var eitt sindur óvæntað, at Vestmenningur vann á Sundalagsstevnu. Í kjalarvørrinum av Norðoyastevnuni sigur tað seg sjálvt, at Eysturoyingur var favorittur, men tað var altso Vestmenningur, sum kom fyrstur á mál í Hvalvík.
Á Norðoyastevnu var Eysturoyingur fremstur við 7.14.05, og Vestmenningur var næstfremstur við 7.16.16. Leygardagin var vinnaratíðin hjá Vestmenningi 9.47.13, og Eysturoyingur var næstfyrstur við 9.49.03. Á Norðoyastevnu kappaðust 10-mannaførini á 1500 metrum, og á Sundalagsstevnu kappaðust tey á 2000 metrum. Sammett við avrikið á Norðoyastevnu var avrikið hjá Vestmenningi hesa ferð 4.21 sekund betri enn tað hjá Eysturoyingi.
Søgan sigur, at Vestmenningur ofta hevur verið eitt sindur tungur í startinum, og at tað ikki hevur verið fyrrenn í miðróðrinum og í endaspurtinum, at Vestmenningur hevur tikið tað, sum hevur verið neyðugt at vinna, fyri at koma fremstur á mál.
Soleiðis var tað ikki á Sundalagsstevnuni. Hjá øllum trimum bátunum – Hoyvíkingi, Eysturoyingi og Vestmenningi – var starturin góður. Eina løtu tóktist tað sum um, at Eysturoyingur hevði hug at stinga seg framum, men Vestmenningur helt honum í sera stuttum tjóðri, og so við og við var tað Vestmenningur, sum tað munaði best hjá.
Hoyvíkingur dragnaði, og tá ið Vestmenningur hevði fingið Eysturoying eina bátslongd afturum, bar tað ongantíð til hjá favorittunum at taka vestmenningarnar. Onkra ferðina tódnaði munurin eitt sindur, men á málinum var eingin ivi. Vestmenningur var meiri enn eina hálva bátslongd frammanfyri Eysturoying, sum var fleiri bátslongdir frammanfyri Hoyvíking.
Teir stóru
Vestmanna er gomul kappróðrarbygd. Seinastu árini hevur tað verið eitt sindur upp og niður hjá 10-mannafarinum. Nú er eldur av álvara komin í aftur, og vestmenningar eru aftur farnir at fylgja við úr vindeygum og túnum, tá ið Vestmenningur summarkvøldini venur.
Í FM søguni, sum gongur aftur til 1973, verður Vestmenningur roknaður millum teir stóru. Um gjørt verður upp í talinum av FM heitum, so er Vestmenningur saman við tveimum øðrum á 2. plássi.
Havnarbáturin eigur flest FM heiti (13), og saman við Eysturoyingi hava Nólsoyingur og Vestmenningur vunnið FM seks ferðir. Tað eru tíggju ár síðani Vestmenningur var meistari, og inntil á Sundalagsstevnu í Hvalvík leygardagin var Vestmenningur ikki komin fyrstur á mál síðani á Ólavsøku í 2002.
Havnarbátin og Nólsoying er tíverri einki at síggja til í ár, og Klaksvíkingur, sum seinastu árini hevur verið so pretin og hevur vunnið tvey FM heiti, er heldur ikki flotaður. Nú eru tað Eysturoyingur og Vestmenningur, sum eru mitt í stríðnum fyri at vinna FM í ár, og harvið í samantalda FM úrslitinum einsamallur at leggja seg á næstfremsta plássið.
Kappingarnar í Klaksvík og Hvalvík boða frá stórum spenningi, og leygardagin verður tað aftur spenningi, tá ið Eysturoyingur fer at rógva í heimasjógvi!
