Á grækarismessu 12. mars 2014 undirskrivaðu Føroyar, Norra og ES eina semju um býtið av makreli, ið býtti 84,4 prosent av heildarkvotuni millum londini og ásetti eitt mark fyri mest loyvdu veiðu.
Harvið er Ísland einasta strandarland, ið ikki er partur av semjuni meðan Russland heldur einki hevur fingið í sín lut og er tað umvegis NEAFC í altjóða sjógvi. Grønland afturímóti hevur ikki enn gjørt krav uppá stovnin, tí at teirra fiskiskapur er enn á royndarstigi.
Men hóast londini eru vorðin samd um býtið millum sín, so er stór ósemja millum londini um hvussu tey restandi 15,6 prosentini skulu býtast til tey londini, ið ikki eru partur av semjuni, sigur Herluf Sigvaldsson, føroyskur samráðingarleiðari.
- Tað hevur aldrin verið ein semja millum londini um hvussu tey restandi 15,6 prosentini skulu býtast. Londini hava so ymisk sjónarmið um hvussu hesi prosentini skulu býtast, at tað verður óvanliga torført at finna eina semju, sigur samráðingarleiðarin.
Føroyski samráðingarleiðarin sigur, at hann næstu dagarnar fer at gera eina seinastu roynd at vita, um tað ber til at semjast um hetta býtið.
- Um tað ikki eydnast, so áseta Ísland, Grønland og Russland sínar egnu kvotur, og harvið verður samlaða veiðan helst yvir mest loyvdu veiðina. Tað tænir ikki áhugamálunum hjá nøkrum, og minst av øllum hjá Íslandi, Grønlandi og Russlandi, tí um makrelstovnurin verður niðurfiskaður, so rýmir hann úr sjóøkinum hjá teimum londunum og altjóða sjógvi, har Russland fiskar. So øll londini hava ein áhuga í, at makrelstovnurin er væl fyri.
