Leygardagin verður aftur matiné í Havnar kirkju, har tey bæði Peter og Betty Arendt luttaka.
Hjúnini bæði eru í Føroyum, millum annað í samband við eitt skeið í vøggusangi í Hoyvíkar kirkju komandi fríggjadag.
Tey eru bæði virknir tónleikarar: Peter sum urguleikari á Haslev kirkju og Betty sum sangari og kórleiðari sama stað.
Tey hava havt nógvar konsertir bæði í Europa, Suðuramerika og Afrika. Fyri ein part tí tey hava fingist við tað sum kallað verður Veraldartónleikur tað er heiti, tá ið fólksligur og kirkjuligur tónleikur frá ymiskum londum verður samskipaður og framførdur á ymiskum málum og háttum.
Við veraldartónleiki hava tey framført og skipað fyri skeiðum í nógvum ymiskum londum. Afturat hesum eru tey bæði virkin innan klassiska tónleikin í Danmark.
Peter hevur millum annað stovnað De Danske Baroksolister og Betty syngur í professionella kórinum Hjá Mogens Dahl og er ofta solistur í framførslum av oratorium og operum. Hon er kend fyri at duga væl at laga seg eftir fremmandum málum og framførlsuháttum. Serliga hevur hon áhuga fyri tí andaliga norðurlendska sanginum.
Á matiné'ini leygardagin klokkan 11:30 fer Betty at syngja bæði klassiskan og fólksligan tónleik, og Peter Arendt fer at spæla forvitnisligan tónleik á urguna.
