Tað hevur ikki gingið væl hjá enska stórfelagnum Arsenal hetta kappingarárið. Úrslitini hava talað fyri seg, og nú hava ringu úrslitini fingið avleiðingar. Arsenal hevur í dag valt at givið spanska venjaranum, Unai Emery, sekkin.
- Vit takka Unai og samstarvsfeløgum hansara, sum áhaldandi arbeiddu fyri at fáa felagið upp aftur á tað støðið, vit øll vænta og krevja. Vit ynskja Unai og hansara toymi alt tað besta í framtíðini, skrivar Arsenal á heimasíðu síni.
Í gjár tapti Arsenal á heimavølli móti týska Eintracht Frankfurt í Europa League, og tað var hetta, ið fekk bikarið til at flóta yvir. Arsenal liggur í løtuni á einum 8. plássi í Premier League við 18 stigum.
Tað er longu greitt, at tað verður svenska Arsenal-legendan Frederik Ljungberg, sum fyribils skal taka yvir komandi tíðina. Ljungberg hevur spælt í nógv ár við Arsenal, og hann hevur virkað sum venjari hjá fyrstaliðnum undir Unai Emery. Men hetta verður bara, inntil Arsenal hevur funnið nýggjan høvuðsvenjara.
