Flokkarnir á tingi skulu í dag velja fólk í tær sjey løgtingsnevndirnar og soleiðis gera av, hvussu tær verða mannaðar restina av valsekiðnum. Í hesum sambandi eru nógvar samráðingar aftur og fram, tí tað er so ymiskt, hvussu nevndarbýtið kann vera.
Vanliga eru tveir valbólkar, samgongan og andstøðan, og samgongan fær meirilutan í teimum flestu – kanska andstøðan fær meirilutan í einari ella tveinum nevndum.
Tær sjey nevndirnar, sum skulu ma nast , sum eru hesar:
Fíggjarnevndin
Landsstýrismálanevndin
Mentanarnevndin
Rættarnevndin
Trivnaðarnevndin
Uttanlandsnevndin
Vinnunevndin
Fíggjarnevndin er tann nevndin, sum vigar tyngst, tí hon hevur stóra ávirkan á fíggjarpolitikkin. Tað verður Javnaðarflokkurin, sum fær leiðsluna í fíggjarnevndini, og verður tað tingkvinna floksins í Klaksvík, Eyðgunn Samuelsen, sum verður forkvinna í fíggjarnevndini. Undir síðstu samgongu var Erhard Joensen, tingmaður Sambandsfloksin úr Vági, formaður í fíggjarnevndini.
Umframt tær sjey tingnevndirnar skulu eisini aðrar sessir mannast. Talan er um val av tveimum umboðum til Norðurlandaráðið, umboð í Útnorðurráðið, løgtingsgrannskoðarar.
Á skránni fyri tingfundin hósdagin verður eisini val av nevningagrundlistanevndum.
