Útbúgvingar- og arbeiðsviðurskifti broytast støðugt, og tað setur stór krøv til, at borgarar kunnu fáa dygdargóða vegleiðing um útbúgvingar- og vinnumøguleikar, og í tí sambandi letur Undirvísingarstýrið upp eina Vegleiðarastovu.
Talan er um eina royndarverkætlan, sum savnar saman verandi vegleiðaratænastur, og eggjar til samstarv á sama fysiska stað. Fyribils eru tað útbúgvingarvegleiðarin, Bára A. Haraldsen, og lestrar- og yrkisvegleiðarin, Deirdre Hansen, sum manna toymið á Vegleiðingarstovuni. Seinni verður ein verkætlanarleiðari settur at standa á odda fyri Vegleiðingarstovuni frá 1. september at rokna.
Verkætlanarleiðarin skal byggja eina samanhangandi og landsumfevnandi skipan upp, umframt at tøkniligar loysnir innan karrieruvegleiðing, so sum fjarvegleiðing gjøgnum netfundir og kjatt, góður tíðarhóskandi kunningarpallur og annað verða mentar, boðar heimasíðan hjá stýrinum frá.
Vegleiðarastovan letur upp fríggjadagin klokkan 10 í hølunum á Hoydalsvegi 1 í Havn, har Studni fyrr helt til.
