Illveður er um alt landið í dag og eftir øllum at døma verður tað ikki nógv frægari, hóast hann minkar um vindin seinnapartin.
Hanus Kjølbro, sjómansskúlalærari, sigur, at í morgun er upp í 25 metrar um sekundið, meðan hvirlurnar eru munandi sterkari í støðum.
Sambært landsverki eru mátingarnar á Norðadalsskarði upp í 54 m/s. Á Porkerishálsi er eisini óvanliga nógvur vindur - upp í 47 m/s.
Í Mykinesi eru mátingarnar upp í 41 m/s, meðan tað um Gjáarsskarð er upp í 45 m/s og á Kambsdali upp í 42 m/s.
- Tað ringasta er fyrrapartin. Hann minkar vindin nakað seinnapartin, men hann minkar spakiliga og endar um 18 mundi niðri á 15 - 20 m/s, sigur Hanus Kjølbro.
Myndina eigur Ingi Sørensen.
