Komandi dagarnar streymar køld luft við ælaveðri móti Føroyum av útsynningi og vestri. Um vikuskiftið fer eitt lágtrýst framvið beint norðan fyri Føroyar. Síðani blæsa kaldir vindar av norðri.
Í dag verður stívt andøvsgul upp í hvassan vind av útsynningi, 10 til 15 m/s, sum út á náttina makar niður í andøvsgul upp í ein strúk, 8 til 13 m/s. Alt døgnið verður samdrigið og ælaveður, møguliga heglingur ella vátakavi og hitin millum 1 og 5 hitastig.
Í morgin verður andøvsgul upp í ein strúk av úrsynningi, 8 til 13 m/s, sum út á dagin makar nakað og um náttina verður lot til andøvsgul av ymsum ættum, 2 til 7 m/s. Samdrigið og serliga fyrrapartin ælaveður, í støðum heglingur ella vátakavi. Hitin millum 2 til 5 stig, um náttina millum frostmarkið og 3 hitastig.
Fríggjadagin øtlar hann vindin í stívt andøvsgul upp í hvassan vind av suðri, 10 til 15 m/s. Skýggjað og regn av vestri. Seinnapartin snarar hann vindin í ein útsynning og vestan og verður andøvsgul upp í ein strúk, 8 til 13 m/s, og tað klárar í, tó okkurt æli, møguliga við heglingi og seint seinnapartin vátakavi. Hitin um dagin millum 3 og 6 stig, um náttina millum frostmarkið og 3 hitastig.
Leygardagin verður stívt andøvsgul upp í hvassan vind av útsynningi, 10 til 15 m/s, út á dagin strúkur í vindi upp í skrið, 13 til 18 m/s. Samdrigið og ælaveður, partvís heglingur ella vátakavi, og hitin millum 2 og 5 stig, um náttina millum 1 og 3 stig.
Sunnudagin verður stívt andøvsgul upp í hvassanvind av vestri og útsynningi, seinni vestri og útnyrðingi, 10 til 15 m/s, fyrrapartin upp í skrið, um 18 m/s, í støðum. Samdrigið og ælaveður, partvís vátaslettingur ella vátakavi. Hitin millum 1 og 4 stig. Um náttina øtlar hann vindin í strúk í vindi upp í skrið av útnyrðingi og norðri, 13 til 18 m/s. Vátaslettingur ella kavi og hitin millum 1 kuldastig og 3 hitastig.
Mánadagin verður strúkur í vindi upp í skrið av útnyrðingi og norðri, 13 til 18 m/s, eitt bil upp í storm, 20 til 23 m/s, um náttina makar hann vindin nakað. Skýggjað og kavaælingur og hitin millum frostmarkið og 3 hitastig, um náttina millum 2 kuldastig og 1 hitastig.
