Oljuleiting
Jan Müller
Mánadagin 15. desember var freistin úti at nominera, velja út nýggj øki til oljuleiting á føroyska landgrunninum. Sigurd í Jákupsstovu, stjóri á Jarðfrøðissavninum, sum tekur sær av málinum í fyrstu atløgu sigur, at teir hava fingið 5 formellar nominatiónir, tvs. har feløg skrivliga hava peikað á øki, sum tey halda vera áhugaverd at taka við í eina 2. Útbjóðing á landgrunninum. Haraftrat hava tey fingið tríggjar munnligar fyrispurningar ella havt sokallaðar óformellar samrøður við nøkur feløg, har hesi kortini bæði beinleiðis og óbeinleiðis hava peikað á øki, sum tey halda vera áhugaverd. Sigurd í Jákupsstovu vil ikki siga, hvørji feløgini eru, men viðgongur, at talan er um feløg, sum eru virkin her longu og feløg, sum ikki eru her.
Hann vil ikki gera nakra viðmerking til, um hetta er eitt gott ella ringt úrslit men vísir á, at vit eiga ikki at taka nominatiónina sum nakað endaligt, tí fyri tað um feløg ikki vísa á øki í hesum umfarinum, so kunnu tey væl bjóða, tá sjálv útbjóðingin verður.
Jarðfrøðissavnið hevði gjørt eina meting av økjum, sum kunnu vera áhugaverd, og henda metingin líkist nógv tí, sum feløgini hava víst áhuga fyri. Men haraftrat eru onkur onnur nýggj øki, sum okkurt felag hevur víst á og sum kanska yvirraskar eitt sindur. Økini, sum feløgini vísa á, eru í høvuðsheitum norðan fyri og fram við markinum, eisini longur inni á landgrunninum og fevna tey um eitt rættiliga stórt øki.
Sigurd í Jákupsstovu sigur, at teir vistu ikki, hvussu stórur áhugi fór at verða fyri nominatiónini. Teir høvdu sjálvandi vónað, at tey feløgini, sum eru í Føroyum, fóru at velja út øki, men tað eru verri enn so øll, sum hava gjørt tað. Men mong feløg hava vent sær til Jarðfrøðissavnið og sagt frá, hví tey ikki hava nominerað. Orsøkin er í flestu førum tann, at tey hava ikki uppdaterað tað regionala arbeiðið, sum lá til grund fyri fyrstu útbjóðing. Tí sóu tey seg ikki før fyri at gera eina veruliga nominering nú. Tey gera vart vit, at fyri tað, at tey ikki hava nominerað, so merkir tað ikki, at tey ikki verða við tá avtornar.
-Hetta er eitt frontierøki tvs. liggur fjarskotið og er lutvíst ókent. Tí verða tað tey stóru feløgini, sum koma at dríva verkið. Tá hesi eru við er eisini møguleika hjá teimum meðalstóru og minni feløgunum, at hekta seg uppí.
Nú verður so farið at gera eitt tilmæli til Ojumálaráðið. Ætlanin er fara í tingið í vár við uppskoti til útbjóðininga. Síðani verður útbjóðing latin upp í summar. Umsóknirnar skulu so latast inn í heyst og loyvini verða latin um ársskiftið næsta ár.
Sosialurin veit frá keldum, at helst verður tað risastóra oljufelagið, ChevronTexaco við í nominatiónini. Hetta telist millum heimsins størstu oljufeløg og hevur fleiri leitiloyvi á bretskum øki tætt upp at føroyska markinum. So hugsast kann, at felagið hevur ein áhuga í at vera báðumegin markið, tá tað í framtíðini fer at bora.
