Frá klokkan 08.00 lokala tíð varð grønlendska flaggið vundið á stong kring landið, og soleiðis varð tjóðardagurin settur.
Sambært Sermitsiaq skuldu millum annað kappingar í grønlendskum tjóðarbúnaði haldast í Paamiut, Nuuk og Ittoqqortoormiit.
Men í Nuuk eru bæði búnakappingin og kópaveiðan avlýstar vegna vánaligt veður.
Í Sisimiut er kortini kaffimikkur á skránni, og aðrastaðni verða gudstænastur, felags máltíðir og dansur á skránni.
Fríðrikur kongur og Mary drotning hava sent grønlendingum eina heilsan í sambandi við dagin.
– Dagurin fellur sum siður er á longsta degi á árinum, og vit vóna, at teir ljósu tímarnir verða ein vakur og hátíðarligur karmur um tey mongu hátíðarhaldini í og uttan fyri Grønland, skriva tey í einum uppslagi á Instagram.
Kongshúsið hevur eisini deilt eina mynd av kongshjúnunum saman við teimum yngstu børnunum, tvíburunum Josephine prinsessu og Vincent prinsi, frá vitjan í Sisimiut í 2024.
Eisini danska forsætisráðfrúan, Mette Frederiksen, hevur ynskt grønlendingum ein góðan tjóðardag.
– Tá trýstið á tykkum veksur, standa tit fast. Tit verja hvønn annan, land tykkara og virðir tykkara. Eg eri errin av felagsskapinum millum lond okkara, sigur hon í einari fráboðan.
Grønlendski tjóðardagurin varð innførdur í 1985. Júst henda dagin í 2009 fekk Grønland sjálvstýri, og síðani 2016 hevur dagurin eisini verið almennur flaggdagur í Danmark.
/ritzau/
