Fríggjadagin 21. oktober var val í Vágs skúla. Valt varð til næmingaráðið og til endurstovnaða ungdómsráðið í Vágs kommunu.
- Barna- og ungdómsnevndin í Vágs kommunu samtykti, at ungdómsráðið skuldi endurstovnast. Ráðið hevur fyrr virkað, og ynski er, at hetta ráð aftur skal koma at virka í Vágs kommunu.
Í kommununi siga tey, at endamálið við ungdómsráðnum er, at ungdómurin í Vági skal hava eina rødd í málum, sum viðvíkja tilboðum og tænastum til ung.
- Ungdómsráðið hevur ikki avgerðarrætt, men er ráðgevandi til avvarðandi nevndir. Somuleiðis hevur ráðið til uppgávu at seta út í kortið verkætlanir, sum tæna ungdóminum í Vági.
Ráðið er mannað við einum umboði úr barna- og ungdómsnevndini, einum samskipara úr umsitingini - og so fýra ungum, sum eru millum 11 og 18 ár.
- Tey ungu umboða Vágs skúla og Ungdómshúsið, har Vágs skúli hevur eitt umboð fyri miðdeildina og eitt fyri hádeildina. Ungdómshúsið hevur eitt umboð, sum umboðar tey ungu og so er eitt umboð, sum umboðar tey eldru í Ungdómshúsunum.
Til valið stillaðu 10 upp, og tá atkvøðurnar vóru taldar upp, vóru hesir vald í ungdómsráðið:
Umboðandi miðdeildina og tey ungu: (Bogi Augustinussen og Áron Jonsson).
Umboðandi hádeildina og tey eldru: (Poul Arni Thomsen og Teitur Brattaberg).
Umframt tey ungu, so er ráðið mannað við Marini H. Gaardlykke, umboðandi barna- og ungdómsnevndina, og Magnusi Paula West, samskipara.
