Hóskvøldið var móttøka í skúlanum í Hvalba í sambandi við, at tveir av lærarunum í skúlanum hava gjørt av at leggja frá sær.
Talan er um hjúnini bæði, Esmar Berg og Elsa Birgittu P. Petersen.
Tey bæði eru væl kend í lærarahøpi, ikki minst av tí, at tey hava bæði verið formenn í Føroya Lærarafelag.
Esmar hevur verið lærari í Hvalba alla tíðina, síðani hann tók læraraprógv í 1971, uttan eitt stutt skifti frá 2001 til 2003, tá ið hann var lærari í Runavík, har Elsa Birgitta eisini var lærari.
Esmar er eisini kendur sum vinstribakkur í Royn frá 1970-75.
Men sum nógvir aðrir ungir dreingir, royndi Esmar eisini sjólívið og var bæði við Norðlýsinum, Stella Karinu og Glyvraberg, umframt við norskum trolara.
Hann hevði ætlað sær ein lívsleið á sjónum, men eyguni biltu, so hann slapp ikki á skiparaskúla, men fór so á Læraraskúla ístaðin.
Esmar var nevndarlimur í lærarafelagnum frá 1988 til 1992 og síðani formaður til 1997.
Elsa Birgitta hevur verið skúlastjóri í Hvalba seinastu 11 árini.
Hon tók læraraprógv á Th. Langs Seminarium í Danmark í 1971 og var fyrst lærari á
Kragelundsskolen, Højbjerg, Århus til 1975, tá ið hon flutti heimaftur.
Her var hon lærari í Runavík og settur deildarleiðari til 1999.
Elsa Birgitta var forkvinna í Lærarafelagnum frá 1999 til 2003, tá ið hon kom til Hvalbiar at vera skúlastjóri seinastu 11 árini av yrkisleiðini.
Á móttøkuni var heilt nógv fólk komið saman at biðja teimum farvæl, har tónleikur, sangur, røður og gávur myndaðu løtuna.
Tey bæði leggja frá sær í dag, og dagurin í gjár var sostatt teirra seinasti skúladagur.
Eydna Danielsen, sum var varaskúlastjóri, er nú settur stjóri fram til summarfrítíðina, og Sigrun Toftheyggj verður varaskúlastjóri fyribils.
