Nú arbeiðssteðgurin á almenna arbeiðsmarknaðinum nærum hevur verið í tvær vikur, er ein nærliggjandi spurningur, hvussu leingi feløgini hava ráð at verða í arbeiðssteðgi. Tað tykist greitt, at bólturin liggur hjá semingsmonnunum, ið eisini arbeiða við málinum.
Gunnleivur Dalsgarð sigur, at enn eru als eingir trupulleikar peningaliga, men hann er ikki samdur við metingini um, at tað almenna nú bert sparir pening, meðan feløgini gjalda.
- Hatta er ein ov naivur hugsanarháttur, tí sjálvt um tað almenna kanska sparir lønir, so er so øgiliga nógv annað, ið verður ávirkað og rakt av arbeiðssteðginum, vísir Gunnleivur Dalsgarð á.
- Eg haldi, at tað ov ofta verður gloymt, at talan líka nógv er um verkbann, sum verkfall, tí báðir partar søgdu nei til semingsuppskotið á sinni, sigur Gunnleivur Dalsgarð, ið metir, at skal endi fáast á, so nyttar ikki bert at venda sær til Starvsmannafelagið, men eisini til Fíggjarmálastýrið, sum hann metir hava eins stóran lut í trætuni.
Gunnleivur Dalsgarð segði seg í gjár hava góðar vónir um, at ein loysn er í eygsjón, og hann segði seg vita, at semingsmenninir arbeiddu við at finna eina loysn, ið vónandi kemur áðrenn páskahátíðin bankar á dyrnar.
