Fróði Waag
Tá tað er sagt, skal beinanvegin verða sligið fast, at tað týðuliga hoyrist, hvør ið rør, hvør er áskoðari, og hvør bara skrivar. Uttan at siga at tey fara skeiv í øllum sum hevur verið sagt, so má eg siga at nógvar av ákoyringunum eru langt við síðuna av. Men tað er ikki nemt, tá ið man ikki veit hvussu ein stevnukappróður verður fyriskipaður. Havi sjálvur verið við til at fyriskipa kappróðurin á Norðoyastevnu í 10 ár, so eg haldi meg kunna tosa uppi í.
Fari at byrja við úttalilsinum hjá Dimmu: Tað líkist púrasta ongum, at ein stevnuróður skal taka so drúgva tíð at avgreiða. Hetta er triðju ferð vit skriva tað í ár og vit hava bara havt tríggjar stevnur enn?
Í Føroyum hevur altíð verið, er, og fer altíð at vera óstøðugt veður. Í Føroyum hevur altíð verið og eru ymiskar róðrarlongdir. Í Føroyum eru róðrarøkini ymisk. Summi hava ein dunnuhyl við bergi/brimgarði at seta fast í, og ein róðrartein, -meðan onnur hava streymasjógv, við trimum ymiskum róðrarteinum, har tons tung drekk skulu niður á 50 favna dypi, fyri at spenna fasta starta startin upp .Leggja vit øll hesi viðurskift saman, so er greitt at vit fáa eitt ótal av kombinatiónum, sum antin kann gera tað til ein frálíkan dag, seint á árinum, við frálíkum fyrireikingum, frálíkum róðrum har øll akta, og eingin tjóðstartar. Askoðarar, Róðrarfólk, fyrireikarar og Róðrarsamband eru nøgd. Hinvegin kann tað vera ein stevna sum liggur tíðliga á árinum, við keðiligum veðri, trimum ymiskum róðrarteinum, "bert" dregg at seta fast í, antin má hanafótur nýtast ella bátarnir reka upp í fasta startin, bátarnir akta illa, og fleiri tjóðstartir eru. Róðrarfólk eru ónøgd, áskoðarar eru ónøgdir, Róðrarsambandið kann ikki annað enn verða ónøgd (tá veit man kanska ikki hví tað tók so langa tíð) og fyrireikarar hanga við "Nevinum" Hvat hendi? Eitt er tó vist; Bløð og heimasíður gotta sær, tí nú hava tey okkurt at skriva um.
Sjálvandi eru til tíðir vánaligar fyrireikingar, og skal tað eisini viðgerast á røttum stað, tá ið tað hendir. Men latið vera við at draga tey óseku við niður! Omanfyri nevnda støða kann meiri enn so koma fyri, uttan at tú kanst lasta fyrireikarunum fyri tað! Minnist í Miðvági í 1998. Tá klappaði alt sum tað skuldi, og fyrireikarar skulu eisini fáa UG fyri tað. Alt varð avgreitt uppá minni enn ein tíma. Ber hettar til í eitt nú Klakksvík ella Runavík? Trúgvi ikki at eg livi at síggja tann dag.
Tað er eisini ógvuligani ymiskt hvussu krøvini eru til avgreiðan av einum róðri. Hettar, alt eftir hvønn tú tosar við. Tosar tú við ein áskoðara, -ja so skal tað taka stutta tíð. Tosar tú við RSF, so er tað av størsta týdningini at alt fer rættvíst og gott framm. Og róðrarfólk: Summi siga at tað tekur alt ov langa tíð, meðan onnur siga at tað skal ikki hastast ígjøgnum. So seint sum kvøldið fyri Norðoyastevnu sigur ein rógvari við meg: Nú mugu tit syrgja fyri at brúka neyðugu tíðina til alt, tí her stendur nógv uppá spæl. Einki við at forhasta tykkum! Minnir meg mest um tá ið eg rópti upp í bingospæli fyri árum síðani, eg gjørdi tað einaferð, og geri tað nokk ongantíð aftur. Líkamikið hvat, so rópti tú anti ov títt ella ov seint, ella rópti tú ov hart ella ikki nóg hart.
Sjálvandi verður einki hastað ígjøgnum. Fólk frá Róðrarsambandinum skulu nokk syrgja fyri at róðurin fer fram so rættvíst sum til ber. Einasta vit sum fyrireikarar kunnu gera, er at royna at hava alt so væl fyriskipað, sum til ber áðrenn, og so royna at hjálpa sum frægast á stevnudegnum. Tað er keðiligt at hoyra, at summi leggja líka í fyrireikararnar, sjálvt um summir biðja sær frí upp í 10 dagar áðrenn stevnu, fyri at alt skal koma uppá pláss.
Fari at hyggja eitt sindur eftir, hví kappróðurin á Norðoyastevnu tók "so langa tíð". Hettar hevði man fingið at vita, um man sum journalistur hevði gjørt sær tann ómak at ringt til okkum! M.a. hendi hetta:
Old Girls róðurin byrjaði ov seint, og seinkaði tískil Fípuni Føgru og Teklu í at koma út á startin til dreingjaróðurin. Her er í ordan at kritisera okkum fyrireikarar.
Tveir tjóvstartir vóru. Ein leggur lættliga 10 til 15 min pr. tjóvstart til totalu tíðina. Tað skal steðgast, vendast, og allir leggjast av nýggjum.
Tá ið barnaróðurin við gentum skuldi byrja, var ein bátur mannaður av dreingjum ístaðin fyri gentum. Í samráð við RSF valdu vit at lata bátin rógva inn fyri at skifta manning. Hettar eru jú ungir rógvarar, og hevði tað eisini verið keðiligt at sent tey til hús, uttan at tey sloppu at rógva. Aftur her fara nógvir minuttir.
Til seinast: Í fleiri ár hava tilburðir við brotnum árum, tollum o. ø. Verið á Norðoyastevnu. Her hava vit, í tann mun vit hava kunnað, hjálpt bátum við at stima inn í neystið eftir tí vit hava haft. Aftur her steðgar róðurin upp. Hettar er ikki okkara uppgáva, men føla vit við rógvarunum. Tað stendur jú nógv uppá spæl.
Alt hetta hoyra bløð og heimasíður sjálvandi einki um, men siga seg kortini hugsa mest um rógvarar og áskoðarar. Men tað er nú einaferð so, at ring tíðindi "selja" betur enn góð!?
Tað er sjálvandi gott at summi hugsa mest um rógvarar, og ikki leggja eftir feløgum og persónum. Men hvat nyttar tað, tá man fyrst dregur felagið niður, fyri síðani at tváa seg sjálvan um hendurnar?
Fari at enda við broti úr grein hjá Sveini Tróndarsyni: Felags fyri allar tríggjar stevnurnar hevur verið, at róðrarnir, sum sambært øllum skráum skuldu byrja klokkan 15.00, ongantíð eru byrjaðir fyrr enn klokkan er farin av hálvgun fýra. Helst væl av. Og tað er ov galið.
Mær vitandi byrjaði kappróðurin á Norðoyastevnu átta minuttir yvir trý. Orsøkina sært tú omanfyri. Hvussu nógv hevur ein tá sett seg inn í viðurskiftini, áðrenn skrivað varð? Gevi tær rætt Sveinur: Tað ER ov galið.
Við vón um eitt gott róðrarár
(Í øllum førum tað sum er eftir av tí):
