Toftir
Um 15-tíðina leygardagin stevndu út við áttati bátar inn í deksbátahavnina í Oyrunum á Toftum. Góður og undirhaldandi harmonikutónleikur ljómaði hesa løtu, og tá bátarnir vóru bundnir við bryggjuna, vórðu allar bátsmanningarnar bjóðaðar út í matarhøllina hjá Faroe Seafood (Nyki) til feska suppu og okkurt leskandi.
Seinnapartin leygardagin og leygarkvøldið undirhildu teir tríggir, Sámal Ravnsfjall, Hallur Joensen og Martin Joensen, á palli.
Væl av fólki var til ymisku tiltøkini, sum vóru á skránni, bæði seinnapartin leygardagin, leygarkvøldið – og ikki minst eydnaðist dansurin í tjaldinum, har Hallur Joensen og hansara tónleikabólkur spædi, væl.
Nógv fólk var í dansi í stóra tjaldinum leygarkvøldið og sunnunáttina.
Festivalbúffarnir, sum eru fastur táttur á bátastevnuni, vóru nógv eftirspurdir og teir, sum stóðu fyri tilreiðingini av hesum, stoktu heilar 400 búffar til stevnugestirnar.
Tá Sosialurin var fram við á festivaløkinum leygarkvøldið, vóru nógv um boði at keypa tekningina, sum hesaferð avmyndaði kendar kvinnur í kommununi í einum báti.
Bill Justinussen, løgtingsmaður, stóð fyri meksikansku uppboðssøluni av tekningini, ið Eyðun Dahl-Christiansen hevði teknað.
Ársins fyrsti bátafestivalur eydnaðist væl, tó at veðurgudarnir ikki lovaðu besta summarveður.
Næsta leygardag verður aftur bátafestivalur í Vestmanna.
Sosialurin fer at venda aftur til bátafestivalin á Toftum – við kunning og myndum.
