Eitt tað søguríkasta fótbóltsfelagið í landinum er aftur í bestu deildini og vit hava saknað tykkum. Tað eru nokk ikki allir havnarmenn, ið vilja viðurkenna tað, men føroyskur fótbóltur er ikki tað sama uttan KÍ. Tað hevur altíð verið ein serlig kapping millum havnarmenn og klaksvíksingar, eins og tað er millum HB og KÍ. Tvey feløg, sum hava vunnið 38 føroyameistaraheiti millum sín, og hava mangan góðan leikara uppælt.
KÍ hevði kanska gott av at fara ein túr í næstbestu deildina, fyri at rudda út og upp í felagnum. Sum skilst, so er felagið skuldafrítt aftur og klárt er at leggja til brots í bestu deildini enn eina ferð. KÍ hevur eina ríka søgu og tosað verður enn um millum annað 66’ liðið, men nú er KÍ komi undan á nýggjum. Tí má søgan ikki tyngja teir ungu, sum komandi ár skuldu stríðast í bláu og hvítu KÍ-troyggjuna. Tað skal ikki skiljast so, at klaksvíksingar ikki skulu verða stoltir av søguni, men hvat KÍ megnaði fyrr, skal ikki seta støðið fyri teir ungu í dag.
Vónandi megnar KÍ at arbeiða við eini langtíðar ætlan, sum kann skapa eitt kappingarført KÍ lið, ið kann bjóða av í oddinum í føroyskum fótbólti í framtíðini. Klaksvík og KÍ er alt ov stórt til ikki at vera ein partur av bestu deildini í føroyskum fótbólti.
