Víkingur er á øðrum plássi, og EB/Streymur er næstaftast. Tí var einki forgjørt í, at Víkingur varð roknaður at vera stórur favorittur undan dystinum í Hólmanum á Eiði seinnapartin.
Men tað eydnaðist ikki hjá Víkingi at vinna fulla úrtøku, hóast Ingi Jonhardsson fimm minuttir undan steðginum legði Víking framum.
Miðskeðis í seinna hálvleiki vóru gestirnir so óhepnir, at teir gjørdu sjálvmál. So var 1-1, og tað vórðu ikki skorað fleiri mál.
Millum teir fyrstu ellivu hjá Víkingi vóru tríggir, sum í gjár vóru við til at vinna 4-1 á Eiði í bestu deildini. Teir vóru Hjalti Strømsten, Arnbjørn Svensson og Bergur Gregersen, sum allir vórðu skiftir inn í seinna hálvleiki.
Á heimaliðnum vóru tríggir, sum í gjár vórðu skiftir inn á besta liðið – Ragnar B. Danielsen, Mikkjal Hellisá og Arnar Dam, sum leingi hevur verið skaddur, men sum nú er við at koma seg aftur.
Víkingur er næstfremst við 26 stigum, og EB/Streymur er á tíggjunda plássi við fýra stigum.
Fríggjakvøldið fær EB/Streymur vitjan av KÍ, og leygardagin fær Víkingur vitjan av HB.
