Tað hevur gingið sum eftir ánni hjá Víkingi síðstu fimm umførini, tí burtur sæð frá einum javnleiki, hevur talan verið um fýra sigrar, og tað hevur lyft liðið fram á næstfremsta plássið í Vodafonedeildini.
Hinvegin hevur ligið munandi verri hjá mótstøðuliðnum í kvøld, KÍ, sum higartil bara hevur fingið fýra stig á kontuna og enn eigur sín fyrsta sigur til góðar í landskappingini í ár.
Sostatt er hetta ein dystur, har Víkingur av øllum alvi fer eftir oddasessinum, meðan KÍ í sínum lagi roynir at bjarga sær okkurt stig eftir turk í longri tíð, so sleppast kann úr botninum.
Dysturin millum Víking og KÍ byrjar í Sarpugerði í kvøld klokkan 18, og sagt verður beinleiðis frá honum á Rás 2.
