Víkingur hevði í dag vitjan av FC Gomel úr Hvítarusslandi í fyrsta undanumfari í Europa League. Líkindini til fótbólt vóru sera góð á Ovara Vølli í Gundadali, har tað var bæði stilt og turt.
Víkingur stóð seg væl í verjupartinum í fyrra hálvleiki og dugdi væl at bróta samanspælið hjá FC Gomel, og eftir 10 minuttum fekk Víkingur ein gyltan møguleika at leggja seg á odda, tá ið Bárður J. Hansen varð feldur í feltinum og fekk brotsspark. Royndin úr 11 metrum hjá Sølva Vatnhamar var tó alt ov vánalig, og Srdjan Ostojic í FC Gomel-málinum bjargaði skotinum.
Víkingur hevði nógvar mans aftanfyri bóltin í verjustøðuni og hetta tóktist at rigga væl, tí fram til teir stóru málmøguleikarnar kom FC Gomel ikki. Hálvleiksstøðan var 0-0.
Í seinna hálvleiki gekk alt galið hjá Víkingi. Erling D. Jacobsen, sum annars hevði spælt væl í miðverjuni í fyrra hálvleiki, varð tikin av vøllinum vegna trupulleikar við baklærinum. Hetta tóktist at vera ein av orsøkunum til, at verjan hjá Víkingi fór fullkomiliga í svart og lat fýra mál inn eftir bara seks minuttum.
Aftanfyri 4-0 var ikki nógv at gera hjá Víkingi, sum at kalla ikki spældi seg fram til nakran góðan málmøguleika, men hinvegin mátti lata tvey mál inn afturat. 0-6 kann ikki sigast at vera nøktandi útgangsstøði á nakran hátt, áðrenn Víkingur spælir returdyst í Hvítarusslandi í næstu viku.
Sí hagtøl og beinleiðis frásøgn frá dystinum niðanfyri.
Víkingur - FC Gomel 0-6
0-1: Vyacheslav Hleb, 53.
0-2: Vyacheslav Hleb, 55.
0-3: Igor Voronkov, 57.
0-4: Ilya Aleksivich, 58.
0-5: Nikolai Kashevsky, 70.
0-6: Artur Levitski, 80.
Liðugt: Kaj Leo í Bartalsstovu hevði eina skotroynd ímóti dystarenda, men tað eydnaðist ikki at pynta um eyðmýkingina. FC Gomel vann dystin greitt 6-0.
87min.: Úr stuttari fjarstøðu var Artur Levitski tætt við at økja til 7-0, men tvørstongin var fyri.
80min.: MÁÁÁÁÁÁL! 6-0 til FC Gomel! Eftir eina góða fríspæling frá Dmitri Platonov tamdi Artur Levitski bóltin væl, rak framvið Geza Turi og økti til 6-0.
70min.: MÁÁÁÁÁÁL! 5-0 til FC Gomel! Nú er vónloysið hjá Víkingi púra eyðsæð. Eftir gott innlegg úr vinstu hevur Nikolai Kashevsky stútað FC Gomel á odda 5-0.
62min.: FC Gomel hevur aftur havt bóltin í málinum, men hesaferð varð málið kolldømt vegna rangstøðu. Verjan hjá Víkingi er ikki til at kenna aftur, nú Erling D. Jacobsen er útskiftur.
58min.: MÁÁÁÁÁÁL! 4-0 til FC Gomel! Aftur misti Víkingur bóltin í uppspælinum og vórðu fangaðir á sínum egna hæli. Ilya Aleksivich gjørdist púra leysur og skeyt teirra fjórða mál upp á bara nakrar fáa minuttir.
57min.: MÁÁÁÁÁÁL! 3-0 til FC Gomel! Nú rapar tað av álvara fyri Víkingi, sum tykist sakna ein annars væl spælandi Erling D. Jacobsen, sum nú er útskiftur. Eftir fleiri atsóknir fekk Igor Voronkov gott skot á bóltin.
55min.: MÁÁÁÁÁÁL! 2-0 til FC Gomel! Víkingur misti bóltin í uppspælinum, og so gekk tað skjótt fyri seg. Vyacheslav Hleb varð spældur leysur og aftur hesaferð setti hann bóltin í málið aftanfyri Geza Turi.
53min.: MÁÁÁÁÁÁL! 1-0 til FC Gomel! Eftir smáspæl í vinstru síðu í feltinum var tað Vyacheslav Hleb, sum skeyt bóltin í mál til 1-0.
51min.: Hóat ein smærri fipurskaða, so tímdi Evrard Blé nú ikki at hyggja at longur og er settur inn á vøllin í staðin fyri Erling D. Jacobsen. Evrard Blé er farin inn á miðvøllin, meðan Fritleif í Lambanum er farin í miðverjuna.
46min.: Eitt dømi um, at venjarin hjá FC Gomel ikki er nøgdur við gongdina, er, at hann hevur valt at skifta út í hálvleikinum. Út er farin miðvallarin Tomasz Nowak, og í hansara stað er komin Artur Levitski.
Hálvleikur: FC Gomel hevði stutt undan hálvleikinum ein stútara beint omanfyri málið, og nú liðini eru farin til hálvleiks, er støðan framvegis 0-0. Víkingur hevur havt besta møguleikan umvegis eitt brotsspark, men teir misnýttu og síðani hevur FC Gomel sitið á tí mesta og tilspælt sær nakrar góðar støður - tó uttan úrslit.
40min.: Teir í hvítarussisku leguni eru farnir at ótolnast eftir úrslitaleysa trýstið, teir royna at leggja á eitt væl berjandi Víkinga-lið.
35min.: Tað er framvegis FC Gomel, sum situr á tí mesta av spælinum, meðan Víkingur hevur nógvar mans aftanfyri bóltin. Tað er einans Hjartvard Hansen, sum liggur fremstur, tá ið Víkingur - sum annars lúrir eftir mótálopum - verjir.
27min.: FC Gomel hevur nú havt eitt langt álop á málið hjá Víkingi, men skotroyndir frá Dimtri Klimovich og Vadim Demidovic fóru ávikavist á Geza Turi og omanfyri málið. Víkingur hevur tørv á at aftur fáa greiðu á verjupartin.
24min.: Tomasz Nowak hjá FC Gomel hevur roynt seg við langskoti, sum fór beint omanfyri málið.
20min.: Eftir at hava havt gott tamarhald á FC Gomel søkja teir nú aftur at. Tað er serliga landsliðsleikari teirra, Vyacheslav Hleb, sum vísir góð kynstur í álopspartinum. Hjartvard Hansen hjá Víkingi hevur fingið gult kort fyri alt ov harða takkling.
15min.: Víkingur er nú væl betur við í dystinum og hevur serliga otað seg fram eftir vøllinum umvegis sína høgru síðu. Í verjupartinum leggja teir nógv fyri og aftra seg als ikki í nærdystunum - hetta tykist hava tikið broddin á hvítarussum.
10min.: Víkingur hevur havt risa møguleika at leggja seg á odda. Bárður J. Hansen varð feldur í brotsteigarmarkinum og fekk brotsspark, men Sølvi Vatnhamar misnýtti úr 11 metrum. Skotið var sera ivasamt við lítlari ferð og eftir jørð næstan mitt í málið, og Srdjan Ostojic í Gomel-málinum hevði ongar trupulleikar av at bjarga skotinum.
5min.: FC Gomel spælir í sínum eyðkenda eysturevropeiska stíli við skjótum smáspæli. Víkingur hevur havt úr at gera við at verja fyri fyrstu løtuna, og í eina førinum var um reppið, at FC Gomel fekk mál. Geza Turi megnaði ikki at halda bóltinum í einari hvítarussiskari skotroynd, men verjan hjá Víkingi var á rætta staðnum og fekk ruddað burt.
Undan dystarbyrjan: Fótbóltslíkindini kundu valla verið nógv betri í Gundadali, har tað er bæði turt og stilt. Víkingur er uttan Lasse Qvist, sum júst er loystur úr sáttmálanum. Evrard Blé hevur verið smáskaddur og royndi seg undir upphitingini, men komið varð fram til, at hann ikki er førur fyri at spæla og verður tískil ikki við í dag.
Liðuppstillingar
Víkingur: Geza Turi - Bárður J. Hansen, Erling D. Jacobsen (51. Evrard Blé) Atli Gregersen, Hanus Jacobsen - Niclas Niclasen (62. Heðin Hansen) - Kaj Leo í Bartalsstovu, Sølvi Vatnhamar, Fritleif í Lambanum, Hans Jørgen Djurhuus (70. Joseph Bassene) - Hjartvard Hansen
FC Gomel: Srdjan Ostojic - Igor Kuzmenok, Pavel Kiryichyk, Nikolai Kashevsky, Dmitri Klimovich - Sergei Matveychik (68. Aleksei Timoshenko) Vyacheslav Hleb, Igor Voronkov, Tomasz Nowak (46. Artur Levitski) Ilya Aleksivich - Vadim Demidovich (58. Dmitri Platonov)
