Talsmaðurin hjá amerikanska uttanríkisráðnum, Ned Price, sigur við tíðindamiðlar í dag, at russisku álopini á ukrainskar vatn-og streymveitingar eru andstyggilig.
- Hesi álop hava til endamáls at gera menniskjansligu líðingarnar hjá ukrainska fólkinum so stórar sum gjørligt, og tí eru hesi álop serliga andstyggilig.
Tað er tíðindastovan Reuters, sum endurgevur talsmannin í amerikanska uttanríkisráðnum fyri hesar útsagnir.
Í gjár skutu russar eitt stórt tal av rakettum eftir fleiri ukrainskum býum og forsetin, Vladimir Putin, hevur sagt, at álopini eru hevnd fyri ukrainsk álop á russiska svartahavsflotan um vikuskiftið.
Ukrainsku myndugleikarnir siga, at flestu rakettirnar, sum russar skutu í gjár, vórðu skotnar niður, men nakrar raktu orkustøðir og gjørdu, at el-og vatnveitingar fórust.
