##med2##
- Hetta er ótrúliga stuttligt, og sjálvandi eru vit í nevndini og umsitingini í Hondbóltssambandi Føroya ótrúliga errin av øllum tí, sum er farið fram, og vit gleðast saman við leikarunum og feløgunum.
Tað sigur Gunn Ellefsen, forkvinna í Hondbóltssambandi Føroya.
Í tíðindunum á FM1 á miðdegi í dag skifti Árni Gregersen orð við hana um góðu úrslitini hjá bæði H71 kvinnum og føroyska manslandsliðnum í hondbólti seinastu dagarnar.
- Eg visti, at tað var ein møguleiki fyri, at tað kundi eydnast manslandsliðnum at koma víðari í kappingini, men eg visti eisini, at tað vóru nógv ting, sum skuldu ganga upp í eina hægri eins, um hetta skuldi eydnast.
Hon heldur, at sjálvt tann størsti optimisturin gjørdist eitt sindur ivingarsamur, tá manslandsliðið tapti greitt ímóti Luxemburg.
- Men, vónirnar vóru har enn. Tað er júst hetta, sum ítrótturin kann. Hann kann fáa okkum niður í djúpastu dalar og upp á hægstu tindar eftir stuttari tíð, og hetta upplivdu vit so eisini hetta vikuskiftið við hondbóltinum.
Hoyr Gunn Ellefsen, forkvinnu í Hondbóltssambandi Føroya, greiða frá upplivingini, tá Árni Gregersen á FM1 á miðdegi í dag skifti orð við hana.
