Tá tað verður sagt, at okkara uppskot er vrakað, so er tað ikki rætt. Sannleikin er heldur, at uppskotið ikki er samtykt, sigur Óla Jákup Rólantsson, programleiðari á Rás 2.
Tá tit so skriva, at uppskotið ikki er borðbært, so er hetta heilt burturvið. Kommunan hevur langt síðan boðað frá og er eisini farin at brúka Rás 2, sum lýsingarmiðil á jøvnum føti við ÚF, sigur programleiðarin á Rás 2.
Mugu hava stuðul
Rás 2 fær ongan almennan stuðul og kann heldur ikki krevja lurtaragjald. Tískil hevur Rás 2 bjóðað Tórshavnar kommunu at gera brúk av hesum miðli. Upphæddin á eina krónu fyri hvønn íbúgva um mánaðin er bert vegleiðandi, tí býráðslimir ynsktu at fáa okkurt tal á borðið.
Programleiðarin vísir á, at bløðini, undantikið Oyggjatíðindi, øll fáa stuðul á einhvønn hátt.
Skal tað koma til skarpskeringar, hvat peningur verður brúktur til, so verða borgarar í Tórshavnar kommunu árliga við pantihóttan tvingaðir at gjalda Útvarpi Føroya 9,5 milliónir í lurtaragjaldi. Og harnæst var eingin trupulleiki hjá kommununi at lata tvær milliónir til ein sendara, so kollfirðingar kunnu síggja m.a. MTV, leggur Óla Jákup Rólantsson aftrat.
Hann heldur tískil, at ein stuðul á 200 túsund krónur, har kommunan fær nakað veruligt afturfyri, ikki er annað enn piparnøtur og slettis einki forgjørt í.
Vit hava ein miðil, har hvør senditími kostar. Hesin skal fyllast og fíggjast. Vit bjóða kommununi at brúka henda møguleika, so einfalt er tað, sigur Óla Jákup Rólantsson, programleiðari á Rás 2.
