Vága kommuna og Sørvágs kommuna hava tikið avgerð um at seta Petru Olsen sum integratiónssamskipara. Talan er um eitt tíðaravmarkað verkætlanarstarv, og Petra byrjar í stavinum hin 1. august.
Petra Olsen hevur drúgvar royndir innan integratión og undirvísing. Síðani 2020 hevur hon undirvíst tilflytarum í føroyskum sum annaðmál (FSA), og hon er millum tey fáu í Føroyum, sum hava serliga útbúgving innan undirvísing av vaksnum tilflytarum í føroyskum.
Gjøgnum sítt arbeiði hevur Petra verið ein av teimum fyrstu, sum nógv nýkomin hava møtt á sínari leið inn í føroyska samfelagið.
- Hon hevur tí eina greiða fatan av teimum avbjóðingum og møguleikum, sum fylgja við tí at flyta til Føroya, og hon hevur drúgvar royndir við at vegleiða og stuðla tilflytarum í bæði málmenning og gerandisdegnum.
- Hesar royndir geva henni eitt gott grundarlag fyri at menna og samskipa integratiónsarbeiðið í Vágum, siga Vága kommuna og Sørvágs kommuna, sum fegnast um at kunna seta Petru í starv, eins og henni verður ynskt blíðan býr.
