Eg veit ikki meira um málið enn SvF segði frá fríggjadagin, sigur Hans Jacob Joensen, biskupur, tá Sosialurin vildi frætta hvør grundgevingin hjá fuglafjarðarprestur var fyri at siga seg úr starvinum.
Í tíðindunum varð nevnt, at orsøkin var, at Peter O.K. Olufsson var ónøgdur við avgerðir, sum bispamyndugleikin hevði tikið.
Sambært reglunum fyri at siga prestaembætið frá sær er galdandi, at prestur søkir kirkjumálaráðið um at verða loystur úr starvi. Prestur sendir umsøknina um próvstin til biskup, sum síðan sendir hana til kirkjumálaráðið. Um tað er rætt, at Olufsson hevur sagt upp, so er vanliga mannagongdin ikki fylgd, sigur bispur.
Eg havi einki bræv fingið, men hugsandi er at prestur hevur boðað kirkjuráðnum frá, at hann ætlar sær frá. Um tað er ætlanin at gera í komandi ári, so kemur áheitanin helst skjótt.
Sambært tíðindunum, er prestur ónøgdur við bispaembætið. Hvat sigur tú til tað?
Tað eru tikinar avgerðir í bispaembætinum, sum Peter O.K. Olufsson hevur verið ónøgdur við, men hann noyðist eins og aðrir prestar at góðtaka kirkjuliga myndugleikan.
Peter O.K. Olufsson hevur áður sagt at hann vil fara frá, men eg trúgvi tí ikki fyrr enn eg havi tað skriftligt, sigur Hans Jacob Joensen
