Afghanska valnevndin hevur avgjørt at strika seinna umfar av forsetavalinum og at tilnevna Hamid Karzai sum vinnara eftir fyrra umfar. Sambært fleiri tíðindastovum hevur valnevndin tikið avgerðina, eftir at hitt valevnið, Abdullah Abdullah, hevur tikið seg aftur. Tað gjørdi hann leygardagin, og sostatt var tað bara Hamid Karzai, sum stillaði upp.
Formaðurin í valnevndini, Daoud Ali Najafi, hevur eisini sagt seg stúra fyri trygdini í sambandi við eitt møguligt umval. Formaðurin hitti í morgun ST-aðalskrivaran, Ban Ki-moon, í Kabul, og tað var aftan á tann fundin, at umvalið bleiv avlýst.
Ban Ki-moon segði í dag, at ST virðir avgerðina hjá valneevndini. Umframt valnevndarformannin hitti hann bæði Karzai og Abdullah.
