Kyndil hevði ikki vunnið í seinastu 10 landskappingardystunum undan vitjanini í Vestmanna í gjár. Seinasta, Kyndil fekk fult, var tann 15. januar, tá botnliðið StÍF vitjaði í høllini á Hálsi.
Nú bragdaði aftur. Kyndilskvinnur vunnu við trimum málum í ítróttarhøllini í Vestmanna í gjár. Úrslitið var 23-20.
Einki at spæla fyri
Dysturin var javnur allatíðina. Tað var ikki fyrr enn seinastu minuttirnar, at Kyndil fór framum og fekk eina leiðslu, sum heimaliðið ikki kláraði at hótta.
Tað hevur darvað spælinum hjá bæði VÍF og Kyndil seinastu vikurnar, at liðini hava einki havt at spælt fyri. Einasta avbjóðingin hevur verið at arga tey trý ovastu liðini, sum hava stríðst um finaluplássini. Tað hevur havt sína ávirkan á avrikini, og dagurin í gjár var einki undantak. Liðini fingu ongantíð veruliga ferð á spælið, og fleiri óneyðug mistøk vóru.
