Ukrainski journalisturin, Vitalii Derekh, doyði í gjár í einum russiskum loftálopi í sonevnda Popasnaya-økinum í Luhansk-regiónini har eysturi í Ukraina.
Tað skriva fleiri ukrainskir miðlar, sum eisini endurgeva søgufrøðingin, Andriy Kovalyov, ið ber hesi tíðindini á sínari Facebook-síðu.
Andriy Kovalyov sigur, at teir báðir eisini hava verið starvsfelagar, og hann rósar journalistinum fyri at hava verið gávuríkur og kreativur í sínum arbeiði.
- Í bardøgum í gjár við russiska hersetingarvaldið doyði mín "eykabeiggi", Vitalii Derekh. Hann doyði í einum loftálopi í Popasnaya-økinum.
Andriy Kovalyov skrivar um vinmannin, at hann var ein kendur journalistur í økinum, har hann starvaðist, og hann ræddist ikki vandar og deyða.
- Vitalii Derekh doyði fyri ukrainskum frælsi, leggur Andriy Kovalyov aftrat. Sambært ukrainskum miðlum gjørdist journalisturin 34 ára gamal.
