Serligi sendimaðurin hjá USA, Keith Kellogg, er komin til ukrainska høvuðsstaðin, Kyiv.
Her fer hann at umrøða trygd hjá Ukraina og revsitiltøk móti Russlandi, sum nú á fjórða ári er í kríggi móti grannalandinum.
Tað er stápsleiðarin hjá ukrainska forsetanum, Andrij Jermak, sum upplýsir hetta, og tað er tíðindastovan NTB sum endurgevur.
Í síðstu viku segði amerikanski forsetin, Donald Trump, at hann í dag fer at koma við einum boðum um Russland.
Forsetin hevur tó einki sagt um, hvørji hesi boð verða.
Vitjanin hjá Keith Kellogg í Ukraina kemur í kjalarvørrinum av, at amerikanski forsetin hevur boðað frá, at hann fer at senda patriot-rakettir til Ukraina.
Hetta segði Donald Trump í gjárkvøldið á herstøðini, Joint Base Andrews, sum liggur uttanfyri samveldishøvuðsstaðin, Washington D.C.
