Tað var tætt, og tað var spennandi í Fuglafirði leygardagin. Spælararnir góvu seg fult og heilt, men kortini vóru teir bláir í kulda, tá ið Rói Jacobsen hevði bríkslað fyri síðstu ferð. Teir skundaðu sær undir tak, og teir á heimaliðnum vóru ovurfegnir, meðan AB spælararnir vóru vónbrotnir.
Einki var at undrast á reaktiónirnar. AB vísti góðan hugburð, og tað eydnaðist miðskeiðis í 2. hálvleiki at svara aftur, eftir at Ari Ó. Ellingsgaard, sum var ytstur á miðvøllinum í vinstru, fýra minuttir eftir steðgin hevði lagt heimaliðið framum.
Útjavnandi málið var fint. ÍF álop varð steðgað mitt á vøllinum, og so streyk vinstri vongverjin Beinir Ellefsen ígjøgnum, smekkaði flatt innfyri, og við handara stólpan stýrdi Bjartur Kjærbo bóltin í málið.
Løtu seinni var um reppið, at innskifti Keita legði AB framum. Hann streyk ígjøgnum eitt sindur til høgru, men úr góðari støðu misnýtti hann, og so var tað, at ÍF skoraði sigursmálið:
Seks minuttir undan leikloki varð Bartal Eliasen skiftur inn í álopið, og ein minutt seinni skoraði hann sigursmálið, tá ið hann í eyðkenda stílinum taklaði bóltin framvið Símun Rógva Hansen og inn um málstrikuna! Mest eyðsýndi ÍF spælarin var Bogi Reinert Petersen, sum var við í tí mesta.
– Eg eri sera fegin, tí hetta var einki serligur dystur at byrja við. Kanska eru vit mann fyri mann stinnari enn teir, men AB hevur staðið seg væl í venjingardystunum, meðan tað er stutt síðani, at vit allir fóru at venja í felag. Tí var uppgávan torfør, og tað kennist sum lætti, at vit vunnu, staðfesti veteranurin í ÍF málinum Jákup Mikkelsen.
Frammanfyri 42 ára gamla ÍF málverjan var sonur hansara, Poul Nolsøe Mikkelsen í ÍF miðverjuni. 19. apríl verður hann 18 ár, og í sínum fyrsta dysti á besta ÍF liðnum stóð hann seg væl:
– Undan dystinum kendi eg eitt sindur til nervar, men meðan vit spældu, so kendi eg tað sum um, at tað gekk væl, segði unglingaspælarin, sum undan hesum kappingarárinum flutti úr KÍ og til Fuglafirðar. Ivaleyst er tað meiri enn sum lundi á jólanátt, at faðir og sonur eru á sama liði og á hægsta støði.
Jan Ó. Ellingsgaard er komin aftur av flatlondum og mannaði vinstra vongverja hjá ÍF. Hinir báðir í ÍF verjuni vóru tvey ættarlið í somu familju. Veteranurin í miðverjuni, 30 ára gamli Høgni Zachariassen, hevði systirsonin saman við sær í verjuni. 19 ára gamli Leivur Joensen var fyri fyrstu ferð vongverji í høgru, og hann vísti gott hegni.
Ari Ó. Ellingsgaard setti hol á fyri ÍF fýra minuttir eftir steðgin, og tað var inngangurin til 40 minuttir, sum endaðu vit 2-1 heimasigri:
– Hetta var ikki gott, tí vit stríddust og okkara vístu góðan hugburð. Men vit vóru ikki nóg disiplineraðir í avgerandi løtum. Tað kostaði, og so var tað ógvuliga óheppið, at vit longu í 1. hálvleiki orsaka av skaða mistu tveir spælarar, staðfesti Sámal Erik Hentze, venjari hjá AB, sum sipaði til Mikkjal Hentse og Leivur Holm Joensen.
